თბილისის საქალაქო სასამართლომ გევორქ სარქისიანის ჯგუფურად ჩადენილ მკვლელობაში ბრალდებულებს 17 და 15-15 წლით თავისუფლების აღკვეთა მიუსაჯათ.

პროკურატურის ინფორმაციით, გამოძიებამ დაადგინა, რომ ორმა ბრალდებულმა, რომლებსაც დაძაბული ურთიერთობა ჰქონდა გევორქ სარქიასიანთან, მესამე ბრალდებულთან ერთად გადაწყვიტეს და დაგეგმეს მისი განზრახ მკვლელობა. უწყების განცხადებით, ისინი 2018 წლის 12 ივლისს შეხვდნენ სარქსიანს და საუბრის დაწყებისთანავე წინასწარი შეთანხმებისამებრ მიაყენეს ფიზიკური შეურაცხყოფა.

მათი თქმით, განზრახ მოკვლის მიზნით, სამივე ბრალდებულმა ხელთარსებული დანებით, სხეულის სხვადასხვა არეში 19 ჭრილობა მიაყენეს გევორქიანს და შემთხვევის ადგილიდან მიიმალნენ. მათივე თქმით, ბრალდებულებს დამალვაში ეხმარებოდნენ სხვადასხვა პირები, რომლებიცგანსაკუთრებით მძიმე დანაშაულის წინასწარ შეუპირებლად დაფარვისთვის გაასამართლეს.

თბილისის საქალაქო სასამართლომ ერთი ბრალდებული დამნაშავედ ცნო საქართველოს სისხლის სამართლის კოდექსის 109-ე მუხლის მე-2 ნაწილის "ე" ქვეპუნქტით და 2381 მუხლის მე-2 ნაწილით (განზრახ მკვლელობა დამამძიმებელ გარემოებებში - ჯგუფურად და განზრახ მძიმე დანაშაულისათვის ნასამართლევი პირის მიერ ცივი იარაღის ტარება) გათვალისწინებული დანაშაულით და საბოლოოდ 17 წლით თავისუფლების აღკვეთა მიუსაჯა. მის მიმართ მიმდინარეობს საერთაშორისო ძებნა.

ორი ბრალდებული დამნაშავედ ცნეს საქართველოს სსკ-ის 109-ე მუხლის მე-2 ნაწილის "ე" ქვეპუნქტით, რაც დამამძიმებელ გარემოებებში ჯგუფურად განზრახ მკვლელობას გულისხმობს. საბოლოოდ თითოეულს 15 წლით თავისუფლების აღკვეთა მიესაჯა.

სამი პირი კი სასამართლომ დამნაშავედ ცნო საქართველოს სსკ-ის 375-ე მუხლით (2018 წლის 12 ივლისის მოქმედი რედაქცია - განსაკუთრებით მძიმე დანაშაულის, წინასწარ შეუპირებლად დაფარვა) და თითოეულს 1 წლით თავისუფლების აღკვეთა მიესაჯა.