მარნეულში საქართველოს ახალგაზრდა იურისტთან ასოციაციასთან შეხვედრაზე მერობის არც ერთი კანდიდატი არ მივიდა, მიუხედავად იმისა, რომ შეხვედრა მათთან შეთანხმებული იყო. ინფორმაცია ამის შესახებ რადიო მარნეულმა გაავრცელა.

როგორც ორგანიზაციის რუსთავის ოფისის იურისტმა, გვანცა საკანელაშვილმა On.ge-ს უთხრა 22 აპრილის შეხვედრის ძირითადი მიზანი ინფორმაციის გაცვლა, წინასაარჩევნო გარემოსა და სავარაუდო დარღვევებზე საუბარი იყო.

მისივე თქმით, ისინი დაუკავშირდნენ მერობის ყველა კანდიდატს, რომლის საკონტაქტო ინფორმაცია ხელმისაწვდომი იყო. საკანელაშვილი ამბობს, რომ მერობის ხუთმა კანდიდატმა წინა კვირას დაუდასტურა, რომ თუ თვითონ არა წარმომადგენელი მაინც მივიდოდა.

"დათქმულ დროს კანდიდატები და მათი წარმომადგენლები როცა არ მოვიდნენ, კიდევ ერთხელ დავუკავშირდით. ნაწილმა მათგანმა არ უპასუხა ჩვენს ზარს ან ვერ დავუკავშირდით. ნაწილმა გვითხრა, რომ ცუდი მეტეოროლოგიური პირობები არ აძლევდათ საშუალებას შეხვედრაზე მოსულიყვნენ", — თქვა გვანცა საკანელაშვილი.

აღნიშნულ შეხვედრას უნდა დასწრებოდნენ ქართული ოცნების, ევროპული საქართველოსა და გაერთიანებული ოპოზიციის კანდიდატები.

გაერთიანებულ ოპოზიციაში On.ge-ს უთხრეს, რომ მათი კანდიდატი აგილ მუსტაფაევი დილით მოსახლეობას ხვდებოდა, რის გამოც შეხვედრაზე მისვლა ვერ მოახერხა. დროის უქონლობას ასახელებენ პარტია ქართულ ოცნებაშიც. მერობის კანდიდატის ზაურ დარგალის პრესსამსახურმა განმარტა, რომ შეხვედრის შესახებ მხოლოდ წინა დღეს აცნობეს და გაწერილი გრაფიკის გამო მისვლა ვეღარ მოახერხა. ევროპულ საქართველოში კი აღნიშნეს, რომ მერობის კანდიდატი აჰმედ იმამყულიევი შეხვედრაზე ჯანმრთელობის მდგომარეობის გამო ვერ მივიდა და მზადაა საიას მომავალში შეხვდეს.