პანკისის ხეობაში დამატებითი ძალები შეიყვანეს, რამაც აქციის მონაწილეების გაღიზიანება გამოიწვია. რამდენიმე წუთის წინ სპეცრაზმმა ცრემლსადენი გაზი გამოიყენა. აქციის მონაწილეებმა სპეცრაზმელებს ქვები დაუშინეს. ადგილზე მობილიზებულია წყლის ჭავლის მანქანა, თუმცა ამ ეტაპზე ის სპეცრაზმს არ გამოუყენებია.

დღეს, 21 აპრილის დილას პანკისის ხეობაში, სოფელ ბირკიანში აქციის მონაწილეებსა და პოლიციას შორის დაპირისპირება მოხდა. ადგილობრივი მედიის პანკისის სათემო რადიოს ინფორმაციით, სპეცრაზმმა აქციის მონაწილეების წინააღმდეგ ცრემლსადენი გაზი და რეზინის ტყვიები გამოიყენა. დაშავებულია რამდენიმე მოქალაქე. ადგილობრივები ამბობენ, ჰესების, კერძოდ მდინარე ალაზანზე "ხადორი 3"-ის მშენებლობის გაგრძელების უფლებას არავის მისცემენ.

გრძელდება ასობით ადამიანის პროტესტი, კვლავ მობილიზებულია სპეცრაზმი და პოლიციის ტექნიკა, მათ შორის წყლის სატყორცნი მანქანები.