სახელმწიფო უსაფრთხოების სამსახურის ინფორმაციით, ქრთამის აღების ფაქტზე თბილისის მერიის გლდანის რაიონის გამგეობის მუხიანის საუბნო განყოფილების მთავარი სპეციალისტი დააკავეს.

უწყების ცნობით, ბრალდებულმა თანამდებობრივი ავტორიტეტის გამოყენებით, საქართველოს მოქალაქეს გლდანის რაიონის გამგეობის მიერ გამოცხადებულ ტენდერში გამარჯვებასა და შესრულებული სამუშაოების ჩაბარებაში დაეხმარა. ამის სანაცვლოდ კი მოსთხოვა და ეტაპობრივად გამოართვა 1 700 ლარი.

საქმეზე გამოძიება სისხლის სამართლის კოდექსის 338-ე მუხლის პირველი ნაწილით მიმდინარეობს, რაც ქრთამის აღებას გულისხმობს. ბრალის დამტკიცების შემთხვევაში მას ექვსიდან ცხრა წლამდე პატიმრობა ემუქრება.