ქართული ოცნების დეპუტატმა, გია ვოსლკიმ განაცხადა, რომ ექსპრეზიდენტმა, მიხეილ სააკაშვილმა ტოლობის ნიშანი დასვა ოკუპანტ რუსეთსა და დასავლეთის ქვეყნებს შორის, როდესაც თქვა, რომ უკრაინას ერთი მხრივ რუსეთი საზღვრავს და მეორე მხრივ დასავლეთის ქვეყნები "კოლონიალისტური მიდგომებით". მისი თქმით, ეს სააკაშვილის ერთგვარი პასუხია იმაზე, რომ საქართველო პოზიტიურ შეფასებებს იღებს ევროკავშირსა და ნატოსთან პოლიტიკურ და ეკონომიკურ თანამშრომლების საკითხებზე.

ვოლსკის მიაჩნია, რომ "საქართველოს ხალხისთვის განსაკუთრებით საინტერესო იქნება პოლიტიკური პარტიებისა და დიპლომატიური კორპუსის წარმომადგენლების" მოსაზრებები იმის შესახებ თუ რატომ აფასებს სააკაშვილი ევროპის ქვეყნების მოღვაწეობას კოლონიალისტურად. მისი თქმით, საზოგადოებრივმა ორგანიზაციებმა და მედიასაშუალებებმა საკითხში გარკვევა უნდა სცადონ.

"დასაშვებია, რომ ეს გამოხტომა მავანმა დასავლეთისაგან უარყოფილი რევოლუციონერი პოლიტიკოსის არაადეკვატურობის მორიგ გამოხატულებად მიიჩნიოს. თუმცა თუკი ყურადღებით გავაანალიზებთ ნაციონალური მოძრაობისაა და მის გარშემო გაერთიანებული სატელიტური პოლიტიკოსების და ნაკლებად პარტიების ბოლოდროინდელ ქმედებებს, მათი საპრეზიდენტო კანდიდატის და ახლა უკვე თავმჯდომარის მონაცემებს, ცილისწამებლურ განცხადებებს, ქვეყნის შიგნით დაუოკებელ მცდელობებს დასკვნებიც სხვა შინაარსის იქნება", — განაცხადა ვოლსკიმ.

მანვე აღნიშნა, რომ სააკაშვილის ხელისუფლება ატარებდა რუსეთის ინტერესებს, რაც 2008 წლის აგვისტოს ომის დროს გამოიხატა.

უკრაინულ დიასპორასთან შეხვედრისას მიხეილ სააკაშვილმა თქვა, რომ ევროპას არ სჭირდება განვითარებული საქართველო და უკრაინა, რადგან კოლონიალისტური მმართველობა აქვთ. მისი თქმით, ევროპას სურს, რომ უკრაინა იყოს წარმატებული და განვითარებული, თუმცა ჩარჩოებში.