ქართული ოცნებიდან წასულმა დეპუტატებმა ეკა ბესელიამ და გედევან ფოფხაძემ იურიდიულ საკითხთა კომიტეტის სხდომა პროტესტის ნიშნად დატოვეს. კომიტეტზე მეორე მოსმენით უნდა განიხილონ ქართული ოცნების კანონპროექტი უზენაესის მოსამართლეთა არჩევის შესახებ.

ეკა ბესელია და გედევან ფოფხაძე სხვა დეპუტატებთან და არასამთავრობო ორგანიზაციებთან ერთად განხილვის გადადებას ითხოვდნენ იქამდე, სანამ ვენეციის კომისია დასკვნას არ გამოაქვეყნებდა. ვენეციის კომისიის დასკვნა ქართული ოცნების დეპუტატების ცნობით, ხვალ 16 აპრილს გამოქვეყნდება.

"პროტესტი ამ ფორმით გამოვხატე, რომ ამ სხდომაში არ მივიღებ მონაწილეობას. გავაგრძელებ დისკუსიას პლენარულ სხდომაზე, როცა ეს საკითხი გამოვა. სამწუხაროა, რომ კომიტეტი ასე არღვევს პროცედურებს. ეს ნიშნავს, რომ კობახიძის პროექტის ყველაფრის ფასად გატანა ხდება", — განაცხადა კომიტეტის დატოვების შემდეგ ეკა ბესელიამ.

გედევან ფოფხაძის თქმით, კომიტეტი თავის ფუნქციაზე ამბობს უარს.

"მგონია, რომ თქვენი არჩევანი გაქვთ ამ საკითხთან დაკავშირებით და აკეთებთ იმას, რაც გგონიათ, რომ არის სწორი, უარს ვაცხადებ ამ კომიტეტში დასწრებასა და განხილვაში მონაწილეობაზე", — განაცხადა გედევან ფოფხაძემ.

ფოფხაძის ამ განცხადებას უპასუხა იურიდიულ საკითხთა კომიტეტის თავმჯდომარემ, ანრი ოხანაშვილმა: "გინდა დაესწარით, გინდა არ დაესწარით, ვერ გავიგე რა ულტიმატუმებით გვესაუბრებით. დასვით შინაარსობრივი საკითხები, რატო გარბიხართ?".

არასამთავრობო სექტორი და ოპოზიციონერი დეპუტატები ამ დრომდე ითხოვენ კანონპროექტის განხილვის გადადებას.

ამავე თემაზე: დარღვეული პირობა — რატომ განიხილავს ოცნება მოსამართლეების კანონპროექტს ვენეციის კომისიის დასკვნამდე