ლეიბორისტული პარტიის ლიდერი, შალვა ნათელაშვილი საპატრიარქოს მოუწოდებს, წინასაარჩევნო კამპანიაში არ ჩაერთოს და უარი თქვას "ეშმაკის ვერცხლზე". ამის შესახებ ნათელაშვილმა პრესკონფერენციაზე ისაუბრა.

მისი თქმით, როდესაც ბიძინა ივანიშვილს პოლიტიკური ძალაუფლებისა და მილიარდების დაკარგვის რეალური საფრთხე დაუდგა, კვლავ მიაკითხა ეკლესიას.

"მან აიღო ვალდებულება, რომ მოხატავს სამების საკათედრო ტაძარს. ჩვენ კარგად ვნახეთ ივანიშვილის მოხატული, აფეთქებული, გადათხრილი საყდრისი და სრულიად საქართველო. მე მოვუწოდებ საპატრიარქოს, უარი თქვით ეშმაკის ვერცხლზე. არ გაუხსნათ მეორე სუნთქვა კრიმინალს, გადამგდებს და ქვეყნის დამაქცეველს", — განაცხადა ნათელაშვილმა.

11 აპრილს ქართული ოცნების თავმჯდომარე ბიძინა ივანიშვილი საქართველოს მართლმადიდებელი ეკლესიის პატრიარქს, ილია მეორეს შეხვდა, სადაც მზადყოფნა გამოთქვა, სრულად დააფინანსოს სამების ტაძრის მოხატვის სამუშაოები.