"ასეთ უხერხულ მდგომარეობაში მყოფი ბიძინა ივანიშვილი ინტერვიუს დროს განსაკუთრებით იმ ნაწილში, რომელიც ეხებოდა ჩვენი წასვლის მიზეზებს არ მახსოვს", — ასე გამოეხმაურა ქართული ოცნების ყოფილი დეპუტატი ეკა ბესელია ბიძინა ივანიშვილის ინტერვიუს, სადაც მან ყოფილი თანაგუნდებელი გააკრიტიკა.

ეკა ბესელიას თქმით, არ შეიძლება არ გახსოვდეს ის პროტესტი, რომელიც პოლიტიკაში მოსვლამდე ჰქონდა ეკა ბესელიას სააკაშვილის რეჟიმის წინააღმდეგ და იმ მოსამართლეების ქმედების გამო, რომლებიც "სწორედაც რომ ძალადობის მსახურნი იყვნენ".

"ყოველ შემთხვევაში ჩემი ბრძოლა არ დაწყებულა არც შარშან, არც შარშანწინ და არც გუშინ, 20 წელია მე სასამართლოს დამოუკიდებლობისთვის ვიბრძვი. ჩემი პოლიტიკური და სხვების პოლიტიკური მეხსიერება გაცილებით დიდია, ვიდრე მისი აღმოჩნდა გუშინ სამწუხაროდ", — განაცხადა ბესელიამ.

ბესელია აცხადებს, რომ პარტია მთავარი განსხვავებების გამო დატოვა და ამაზე ბიძინა ივანიშვილმაც გასცა თავად პასუხი.

"სწორედ იმ მთავარი განსხვავების გამო, რომელის დემონსტრირებაც მოახდინა მან ამ ინტერვიუთი. მან თქვა, რომ ის იცავს და მიაჩნია, რომ მსხვერპლი არიან ის მოსამართლეები, რომელთა მიმართაც არსებობს საზოგადოების მაღალი უნდობლობა. ზარდიაშვილები თურმე მსხვერპლი არიან იმიტომ რომ მათ მოინანიეს და თქვეს, რომ ადეიშვილ-მერაბიშვილი თურმე არ არიან უსამართლოდ გასამართლებული და ეს საკმარისი აღმოჩნდა, რომ ის დამდგარიყო ამ ადამიანების დამცველად", — განაცხადა ეკა ბესელიამ.

"გუნდი თითქმის დაწყნარდა", — ამ სიტყვებით შეაფასა ქართული ოცნების თავმჯდომარემ ბიძინა ივანიშვილმა პარტიიდან ეკა ბესელიას, გედევან ფოფხაძის, ლევან გოგიჩაიშვილისა და ზვიად კვაჭანტირაძის წასვლა. ის ამბობს, რომ გუნდიდან წასულებს მიზეზი არ ჰქონდათ და "ღია კარის მტვრევით" დატოვეს პარტია.