"ძალიან გთხოვთ ყველას, ყურადღებით იყავით", — ამ სიტყვებით მიმართა დეპუტატებს პარლამენტის ვიცე-სპიკერმა, გია ვოლსკიმ გამოსაშვები გამოცდების გაუქმების კანონპროექტის კენჭისყრამდე. კანონპროექტს დღეს მეორე ცდაზე უყარეს კენჭი.

კენჭისყრამდე რამდენიმე დეპუტატმა ვოლსკის მიმართა და უთხრა, რომ დარბაზში ხმაური იყო, რაზეც ვოლსკიმ უპასუხა, რომ "ხმაური ხშირად არის". ვოლსკიმ დეპუტატებს განუმარტა, რომ გამოცდების გაუქმების კანონპროექტი ერთადერთი საკითხია, რომელსაც პარლამენტი დღეს უყრის კენჭს.

დღეს, 8 აპრილის რიგგარეშე სხდომაზე საქართველოს პარლამენტმა მესამე მოსმენით, უკვე მეორე ცდაზე დაუჭირა მხარი საგამოცდო რეფორმის შესახებ კანონპროექტს. ამ კანონით სკოლებში გამოსაშვები გამოცდები უნდა გაუქმდეს. 5 აპრილს დეპუტატებს კანონპროექტებიც აერიათ და გამოსაშვები გამოცდების გაუქმების კანონპროექტი ჩააგდეს.