ერთიანი ნაციონალური მოძრაობის მედია მდივან ირმა ნადირაშვილი აცხადებს, რომ მათი პარტიის მაჟორიტარობის კანდიდატსა და აქტივისტებს ქართული ოცნების მხარდამჭერები კიდევ ერთხელ დაუპირისპირდნენ. ნადირაშვილის თქმით, ინციდენტი ამჯერად გორში მოხდა.

"ხელისუფლება ერთი ხელით გვთავაზობს მემორანდუმს და თითქოს სურს, არჩევნები ჩატარდეს ცივილიზებულად, მაგრამ მეორე ხელით იქცევა სრულიად ველურად. გორში, პარტიის მაჟორიტარობის კანდიდატს და აქტივისტებს ქართული ოცნების მხარდამჭერები დაუპირისპირდნენ. ინციდენტი სოფელ ფლავისმანში მოხდა, სადაც ბადრი ბასიშვილს ამომრჩეველთან შეხვედრის საშუალებას არ აძლევდნენ".

ნადირაშვილი ქართულ ოცნებას ადანაშაულებს და აცხადებს, რომ ხელისუფლებამ ბადრი ბასიშვილს დაახვედრა ე.წ. ზონდერები:

"კონკრეტულად, დაახვედრა მოჭიდავეები და სპირტსკოლის წარმომადგენლები. ამ ყველაფერს კი ხელმძღვანელობდა მალხაზ მეტრეველი. ეს ადამიანი მუშაობს საჯარო სამსახურში და მას დავალებული აქვს ამ ზონის კონტროლი. მოჭიდავეების და სხვა ზონდერების დახმარებით ისინი ცდილობდნენ, რომ ნაციონალური მოძრაობის კანდიდატი არ შეეშვათ სოფელში და ადგილი ჰქონდა ფიზიკურ შეხლა-შემოხლასა და სიტყვიერ შეურაცხყოფას".

გუშინ ნაციონალურმა მოძრაობამ გაავრცელა ინფორმაცია, იმის შესახებ, რომ ქართული ოცნების დანით შეიარაღებული აქტივისტები სოფელ გამარჯვების ერთიანი ნაციონალური მოძრაობის შტაბში შეიჭრნენ და ფიზიკურად გაუსწორდნენ შტაბის წევრ ნიკა მჭედლიძეს.

აღნიშნულ ფაქტთან დაკავშირებით, ქართულმა ოცნებამ მოუწოდა მხარდამჭერებს, არ ჩაებან კონფლიქტებში, ხოლო შსს-მ განაცხადა, რომ ინციდენტში ცივი იარაღი არ ფიგურირებდა.

15 სექტემბერს გიორგი კვირიკაშვილმა და ქართული ოცნების აღმასრულებელმა მდივანმა, ირაკლი კობახიძემ საარჩევნო სუბიექტებს შესთავაზეს, შეუერთდნენ ე.წ. სამშვიდობო მემორანდუმს იმისთვის, რომ არჩევნები კორექტულ და მშვიდობიან გარემოში ჩატარდეს.