უკრაინის მინისტრთა კაბინეტმა რუსეთის მიმართულებით ჩარტერული რეისები სრულად აკრძალა. გამონაკლისი იქნება რეისები, რომელიც გაეროს, წითელი ჯვრისა და ეუთოს მისიებისთვის იქნება საჭირო.

როგორც გამოცემა Unian წერს, მინისტრთა კაბინეტმა აღნიშნული გადაწყვეტილება მას შემდეგ მიიღო, რაც ყოფილი საპრეზიდენტო კანდიდატი იური ბოიკო 22 მარტს მოსკოვში ჩაფრინდა და რუსეთის პრემიერ-მინისტრს, დიმიტრი მედვედევს შეხვდა.

უკრაინის შინაგან საქმეთა მინისტრმა, არსენი ავაკოვმა განმარტა, რომ ქვეყანაში რამდენიმე რუსული კომპანიის მიმართ შეზღუდვა დაწესდა, თუმცა ის არ ეხებოდა არარეგულარულ რეისებს, რომლებსაც რუსეთში არარეგისტრირებული კომპანიები ახორციელებდნენ. მისივე თქმით, ბოიკომ კანონის სწორედ ეს ხარვეზი გამოიყენა.

"ჩვენ შეგვიძლია შევიმუშაოთ ნებისმიერი შეზღუდვა, თუმცა რთულია შეზღუდვის შემოღება სინდისის დაკარგვის წინააღმდე", — განაცხადა ავაკოვმა.

უკრაინის საპრეზიდენტო არჩევნები 31 მარტს გაიმართა. წინასაარჩევნო პერიოდში იური ბოიკო ყველაზე პრორუსულ კანდიდატად მიიჩნეოდა. არჩევნებზე ხმების 11,67 პროცენტით მეოთხე ადგილი დაიკავა.