თბილისში პირველი კერძო მაღალტექნოლოგიური ცენტრი - სილიკონ ველი თბილისი გაიხსნა. ცენტრი IT აკადემიას, ბიზნეს და ტექნოლოგიების უნივერსიტეტს, სკოლას, ლაბორატორიულ და კვლევით ცენტრებს, ტექნოლოგიურ ინკუბატორებს ერთ სივრცეში გააერთიანებს.

ცენტრის გახსნას პრემიერმინისტრი, გიორგი კვირიკაშვილი დაესწრო და იმედი გამოთქვა, რომ ცენტრი დიდ დახმარებას გაუწევს პროგრამულ ინჟინრებს და მეწარმეებს იმისთვის, რომ კიდევ უფრო განავითარონ თავიანთი ბიზნესიდეები:

"ეს არის უმნიშვნელოვანესი პროექტი და ძალიან მოხარული ვართ, რომ პირველი კერძო ინვესტიცია არის მაღალტექნოლოგიური მიმართულებით. სასიხარულოა, რომ მთავრობის ინიციატივები, რომლებიც დაწყებული იყო შარშან - პირველი ტექნოპარკის გახსნა, მაღალტექნოლოგიური და ინოვაციური მიმართულების განვითარება, ასე აიტაცა კერძო სექტორმა.

ჩვენ ძალიან გვახარებს კომპლექსური ხედვა, რომელიც ამ ჯგუფს აქვს და ის ინფრასტრუქტურის მრავალფეროვნება, რომელიც აქ არის. ეს არის სკოლა, მაღალტექნოლოგიური უნივერსიტეტი, IT საინფორმაციო ტექნოლოგიების მიმართულება, ლაბორატორიები, ტრენინგ-ცენტრები და ა.შ. ძალიან მნიშვნელოვანია, რომ ეს ინფრასტრუქტურა ხელს შეუწყობს ინოვაციური აზროვნების და სამეწარმეო სულისკვეთების განვითარებას ქვეყანაში".

კვირიკაშვილის თქმით, მნიშვნელოვანია, რომ მაღალტექნოლოგიური ცენტრში დაინერგება დუალური სწავლების მოდელი, რაც გულისხმობს სწავლის პარალელურად, სტუდენტების სამუშაო ადგილით უზრუნველყოფას.