სახალხო დამცველის 2018 წლის ანგარიშში აღნიშნულია, რომ პოლიციამ ძალადობის ორ საქმეში შემაკავებელი ორდერი მსხვერპლის წინააღმდეგ გამოსცა. ომბუდსმენის განმარტებით, სასამართლომ ორდერი ორივე შემთხვევაში გააუქმა.

როგორც დოკუმენტში ვკითხულობთ, 2018 წელს ქალთა მიმართ ძალადობის ფაქტზე გამოიცა 205 შემაკავებელი და 130 დამცავი ორდერი. ამავე დროს, ადევნების მუხლით გამოძიება 126 საქმეზე დაიწყო.

სახალხო დამცველი აღნიშნავს, რომ პრობლემად რჩება რეგიონებიდან დაბალი მიმართვიანობა ოჯახში ძალადობის და ქალთა მიმართ საკითხებთან დაკავშირებით. ამასთანავე, ომბუდსმენის ანგარიშში ხაზგასმულია, რომ მუქარის ფაქტების იდენტიფიცირება ძალადობად, პრობლემურია და აქცენტი ხშირად მხოლოდ ფიზიკურ დაზიანებებზე კეთდება.

ომბუდსმენის ანგარიშში საუბარია მსხვერპლების მიმართ პოლიციის მხრიდან დამოკიდებულებაზეც. როგორც სახალხო დამცველი წერს, იყო შემთხვევები, როდესაც ძალადობის დადგენისთვის პოლიციის შენობაში მოძალადესთან სიტყვიერად დააპირისპირეს. გარდა ამისა, მსხვერპლები პოლიციელების მხრიდან შეურაცხმყოფელ და დამცინავ დამოკიდებულებაზე უთითებენ.

"სამართალდამცავი უწყების წარმომადგენელების არამგრძნობიარე დამოკიდებულებისა და პოლიციის განყოფილებებში არსებული ინფრასტრუქტურის გამო, რაც შეუძლებელს ხდის ძალადობის მსხვერპლთათვის მეგობრული სერვისების შეთავაზებას, რიგ შემთხვევაში, მსხვერპლები უარს აცხადებენ პოლიციისთვის განმეორებით მიმართვაზე", — წერია ანგარიშში.

ომბუდსმენი აღნიშნავს, რომ პრობლემურია სექსუალური დანაშაულის კუთხით არსებული კანონმდებლობა, რომელიც ითხოვს ფიზიკური წინააღმდეგობის გაწევის დადასტურებას.

ამავე თემაზე: