პრემიერმინისტრმა, გიორგი კვირიკაშვილმა საქართველოს სივრცითი მოწყობის პროექტის პრეზენტაცია გამართა, რომლის ერთ-ერთი მთავარი კომპონენტი 2020 წლამდე 1000 კმ-მდე საავტომობილო გზის მშენებლობა-რეკონსტრუქციაა.

აღნიშნული კომპონენტის სავარაუდო ღირებულება დაახლოებით 3,5 მილიარდ დოლარს შეადგენს. ასევე იგეგმება 550 კმ ავტომაგისტრალის მშენებლობა და 800 კმ-მდე გზის რეაბილიტაციაც.

გარდა ამისა, პროექტის გეგმის თანახმად, 300-მდე სახიდე გადასასვლელი და 50 საავტომობილო გვირაბის მშენებლობაა დაგეგმილი. სივრცითი მოწყობა ასევე ითვალისწინებს რკინიგზის სადგურების, პორტებისა და აეროპორტების აშენებას და რეაბილიტაციას, არსებული ტურისტული ინფრასტრუქტურის რეაბილიტაციასა და ახლის შექმნას.

როგორც პრემიერმინისტრმა განმარტა, ყველა რეგიონის მოსახლეობისთვის თანაბრად ხელმისაწვდომი უნდა გახდეს ისეთი სერვისები, როგორიც არის ხარისხიანი განათლება, ჯანდაცვა და სოციალური ინფრასტრუქტურა:

"ხელი უნდა შეეწყოს მოსახლეობის დასაქმებას მშობლიურ რეგიონებში, ტურისტებს უნდა შეეძლოთ შეფერხების გარეშე ჩასვლა ყველა რეგიონში და საქართველოს ყველა რაიონი უნდა გადავაქციოთ ოთხსეზონიან საკურორტო მიმართულებად".

მან განმარტა, რომ ამის მიღწევა შესაძლებელია მსოფლიოს მოწინავე ქვეყნებში აპრობირებული გზით - ინსტრუმენტით, რომელსაც ქვეყნის სივრცითი მოწყობა ჰქვია. კვირიკაშვილის განმარტებით, არსებული საავტომობილო გზები, ავტობანების არსებული მონაკვეთები, საქართველოზე გამავალი ტრანზიტული კორიდორები თანამედროვე სტანდარტებთან შესაბამისობაში იქნება მოყვანილი.

ამასთან, აშენდება ახალი გზები შეიკვრება ერთიანი ჩონჩხი, რომელიც ქვეყანას ახალ სიცოცხლეს მიანიჭებს და ყველა რეგიონში თანაბრად იქნება ხელმისაწვდომი აუცილებელი პირველადი ინფრასტრუქტურა.:

"საქართველოს მთავრობა უკვე მუშაობს ქვეყნის სივრცითი მოწყობის სქემის შექმნაზე. ამ რეფორმის ფარგლებში, უპირველეს ყოვლისა, უნდა შეიქმნას ახალი სატრანსპორტო არტერიები. საქართველოს აქვს სრული პოტენციალი, ჩამოყალიბდეს ევროპისა და აზიის დამაკავშირებელ სატრანსპორტო და ლოგისტიკურ ჰაბად. ამ კონტექსტში უდიდესი როლი ენიჭება საგზაო ინფრასტრუქტურის მოწესრიგებას და თანამედროვე, ევროპული სტანდარტების მიხედვით განვითარებას".