საქართველოს პარლამენტის წევრის, ეკა ბესელიას თქმით, მას განცდა რჩება, რომ მისი ყოფილი თანაგუნდელები, დავით მათიკაშვილი, ანრი ოხანაშვილი და სოფო კილაძე მორალური ტერორის მონაწილეები არიან. ასე გამოეხმაურა ის Facebook-ში ინტერნეტში პოლიტიკოსის პირადი ცხოვრების ამსახველი კადრების კიდევ ერთხელ გავრცელებას.

"ყველას გვარს რა ჩამოთვლის... კოლექტიური ტერორისტები... მათი კომენტარები ისეთი ამაზრზენია... უხარიათ... ვერ მალავენ შურისძიების სურვილს, ვერ ახერხებენ ასეთ დროს მაინც თავშეკავებას თავდასხმისგან..." — წერს ბესელია.

მისი თქმით, ადვილი არ არის ამ დროს ქალის გამარჯვება.

"მე მინდა გაჩვენოთ, რომ ქალის დამარცხება ამ მეთოდებით შეუძლებელია, როცა ის იბრძვის სიმართლისა და სამართლიანობისთვის! მე მინდა დაიჯეროთ რომ შეუძლებელია გატეხო ქალი, როცა ის იბრძვის სხვათა დასაცავად და სამშობლოს უკეთესი მომავლისთვის!!! მე ვეცდები ეს საკუთარი მაგალითით დაინახოთ და დაიჯეროთ!!!" — აღნიშნავს ბესელია.

ინტერნეტში ქალი პოლიტიკოსი ქალის პირადი ცხოვრების ამსახველი კადრები დაახლოებით ორი კვირის წინ ისევ ატვირთეს. ამის შესახებ ინფორმაცია გუშინ, 27 იანავარს გავრცელდა.