ქართული ოცნების დეპუტატების ნაწილი ადასტურებს, რომ თანაპარტიელის, ეკა ბესელიას კანონპროექტის კენჭისყრამდე საერთო შეტყობინება მიიღო. ტაბულას ინფორმაციით, ამ შეტყობინებაში ეწერა, რომ მხარი არ დაეჭირათ მოსამართლეების უვადოდ დანიშვნის პროცესის 2024 წლამდე გადაწევისთვის, რადგან ეს ქართული ოცნების დატოვებას ნიშნავდა.

ამ თემასთან დაკავშირებით On.ge-მ საპარალამენტო უმრავლესობის რამდენიმე დეპუტატი ჩაწერა. წერილის მიღებას ადასტურებენ თამარ ხულორდავა, ზაზა ხუციშვილი, რატი იონათამაშვილი და ნუკრი ქანთარია.

"კი, იყო ასეთი წერილი, ბიძინა ივანიშვილი არ იყო ავტორი. ბიძინა თავად დამირეკავდა. აქ არ იყო მოწოდება გუნდის დატოვებაზე, რჩევის სახით იყო, რომ თუ არ დაემორჩილებით ამ მოწოდებას, ეს ნიშნავს იმას, იმას", — ამბობს ნუკრი ქანთარია On.ge-სთან საუბრისას.

იონათაშვილი კი აღნიშნავს, რომ მიღებული წერილის შინაარსი ემთხვეოდა პოლიტსაბჭოს პოზიციას და მასში ახალი, ფაქტობრივად, არაფერი ეწერა. ისიც თანაგუნდელების მსგავსად ამბობს, რომ ეს არ ყოფილა ბიძინა ივანიშვილისგან ან ირაკლი კობახიძისგან მიღებული შეტყობინება.

დეპუტატი ლევან გოგიჩაიშვილი ამბობს, რომ "ჩატში არ ჩაუხედავს", გედევან ფოფხაძის თქმით, კი მიმოწერაზე წვდომა არ ჰქონდა.

"გადმოცემით ვიცი, რომ მსგავსი ტექსტი იყო ჩათში ჩაგდებული, მაგრამ ვინაიდან ამ ჩათში არ ვარ, დანამდვილებით ვერ გეტყვით ეს წერილი რას გულისხმობდა. მაგრამ ვიცი, რომ იყო ტექსტი, რომელიც ხმის მიცემის ნეგატიურ შედეგებზე საუბრობდა", — განმარტა ფოფხაძემ.

წერილის მიღებას არ ადასტურებს ბიძინა გეგიძე და კობა ნარჩემაშვილი, შოთა ხაბარელი კი ამბობს, მიღებულ შეტყობინებას მის გადაწყვეტილებაზე გავლენა არ მოუხდენია.

მოსამართლეთა უვადოდ დანიშვნის პროცესის შეჩერებაზე ეკა ბესლიასა და მისი თანამოაზრეების კანონპროექტი გუშინ, 21 თებერვალს პარლამენტმა ჩააგდო. კანონპროექტს ხმა 45-მა დეპუტატმა მისცა, 17 — წინააღმდეგი იყო. ქართული ოცნებიდან მხარდამჭერებს შორის იყვნენ: რევაზ არველაძე; ეკა ბესელია; ბიძინა გეგიძე; ლევან გოგიჩაიშვილი; ალექსანდრე ერქვანია; ზვიად კვაჭანტირაძე; ლევან კობერიძე; გიორგი მოსიძე; კობა ნარჩემაშვილი; ბექა ნაცვლიშვილი; ზაზა პაპუაშვილი; რუსლან პოღოსიანი; გია ჟორჟოლიანი;
გედევან ფოფხაძე; ალექსანდრე ქანთარია; ოთარ ჩრდილელი; მირიან წიკლაური.