ქირურგიის ეროვნულ ცენტრში აცხადებენ, რომ გავრცელებული ინფორმაცია ეგვიპტის მოქალაქის, ვაგდია ელკორაიეს ცემის შესახებ სიმართლეს არ შეესაბამება. მათი განმარტებით, ელკორაიე თავად გამოირჩეოდა აგრესიით და სამედიცინო პერსონალის მიმართ უპატივცემულობით.

ქირურგიის ცენტრში ამბობენ, რომ სიცრუეა ისიც, თითქოს ელკორატიეს მამას კლინიკაში შესაბამისი სამედიცინო დახმარება არ მიეწოდება. მათი თქმით, პაციენტს საავადმყოფოში დავალიანება აქვს, რაც ეჭვს აჩენს, რომ მისი შვილის ქმედებები პროვოკაციის მცდელობაა.

კლინიკაში ამბობენ იმასაც, რომ ელკორაიე თავად უქმნის საფრთხეს თავისი მამისა და სხვა პაციენტების ჯანმრთელობას. მათივე თქმით, ის არაერთხელ შეიჭრა რეანიმაციულ განყოფილებაში, სადაც სხვა პაციენტებიც არიან. კლინიკაში განმარტავენ, რომ გუშინ, 20 თებერვალს ელკორაიემ "დებოში" მოაწყო და საჭირო გახდა პოლიციის გამოძახება.

20 თებერვალს ელკორაიეს ადვოკატმა გაავრცელა ინფორმაცია, რომ საავადმყოფოს დაცვის თანამშრომლები მისი დაცვის ქვეშ მყოფს თავს დაესხნენ. მისი თქმით, ამის მიზეზი ის გახდა, რომ ელკორაიეს პალატიდან სახვევები გამოჰქონდა. მისივე თქმით, ამ გზით ის ცდილობდა დაემტკიცებინა, რომ მამამისს კლინიკაში ცუდად უვლიდნენ, რის შემდეგაც მას ჭრილობაზე მატლები დაესია.

შინაგან საქმეთა სამინისტრომ ძალადობის საქმეზე გამოძიება სისხლის სამართლის კოდექსის 126-ე მუხლით დაიწყო. მათივე თქმით, გამოძიების ფარგლებში გამოიკითხებიან კონფლიქტში მონაწილე პირები, დაინიშნება შესაბმისი ექსპერტიზები.

ქირურგიის ეროვნულ ცენტრში აცხადებენ, რომ დაწესებულება მიმართავს ყველა სამართლებრივ ბერკეტს საკუთარი ინტერესების დასაცავად, მათ შორის საქმიანი რეპუტაციის შემლახველი ცნობების გავრცელების ფაქტთან დაკავშირებით.