ზოგადი განათლების განვითარების დეპარტამენტის უფროსის, მარიამ ჩიქობავას ინფორმაციით, სკოლებში ჩინური ენის სწავლა მეორე უცხო ენად, მეხუთე კლასიდან იქნება შესაძლებელი. ამ ენის შესწავლა მოსწავლეებისა და მშობლების სურვილზე იქნება დამოკიდებული.

"ჩინეთის საელჩოსთან, თავისუფალი უნივერსიტეტის კონფუცის ინსტიტუტთან თანამშრომლობით უკვე მომზადდა წლიური პროგრამა, ასევე გრამატიკა და ჩვენს მოსწავლეებს შესაძლებლობა ექნებათ, რომ მეხუთე კლასიდან აირჩიონ ეს ენა.. ახალი სასწავლო წლიდან შევხედავთ, რამდენად დიდი იქნება სურვილი და დაინტერესება სკოლების მხრიდან და მათ ცხადია, გავუწევთ დახმარებას ამ მიმართულებით", — ამბობს ჩიქობავა.

მისი განმარტებით, სკოლამ უნდა გამოთქვას სურვილი და იმ შემთხვევაში, თუ მოსწავლეთა გარკვეული რაოდენობა მოგროვდება და ჯგუფი შედგება, სამინისტრო უზრუნველყოფს სასწავლო რესურსებით მათ მომზადებას, მათ შორის პედაგოგების გადამზადებას. მისივე თქმით, პედაგოგი შეიძლება იყოს ჩინელი ან ქართველი, რომელმაც იცის ჩინური ენა.