ქართული ოცნების დეპუტატმა ლევან გოგიჩაიშვილმა იურიდიულ საკითხთა კომიტეტის ახალ თავმჯდომარეს ანრი ოხანაშვილს არა არჩეული, არამედ დანიშნული უწოდა. მისივე თქმით, ოხანაშვილი თანამდებობაზე სასამართლომ დანიშნა.

"შენ ხარ დანიშნული თავმჯდომარე და კარგად იცი ვის მიერაც, სასამართლომ დაგნიშნა. კეთილი ინებე და მოგვისმინე, რადგან ჩვენ გასწავლით და შენ ვერ გვასწავლი. მე გასწავლი როგორ უნდა კოლეგების მოსმენა და პოლიტიკის კეთება", — მიმართა ლევან გოგიჩაიშვლმა ანრი ოხანაშვილს.

ლევან გოგიჩაიშვილის განცხადებას კომიტეტის სხდომაზე, სადაც მოსამართლეების უვადოდ დანიშვნის დროებით შეჩერების საკითხს დაჩქარებულად განიხილავენ, კამათი მოჰყვა.

ოხანაშვილის განცხადებით, ლევან გოგიჩაიშვილის განცხადება იმ დეპუტატთა შეურაცხყოფაა, რომლებმაც კომიტეტის თავმჯდომარის არჩევაში მიიღეს მონაწილეობა.

"დეპუტატი კაცი იმდენს უნდა ხვდებოდე, რომ შენს კოლეგებს შეურაცხყოფას არ აყენებდე. ეს არის ყველა იმ დეპუტატის შეურაცხყოფა, რომელმაც ხმა მომცა. შენ მე ვერაფერს მასწავლი!", - აღნიშნა ანრი ოხანაშვილმა.

იურიდიულ საკითხთა კომიტეტის სხდომაზე მოსამართლეთა უვადოდ გამწესების 2024 წლის 31 დეკემბრამდე გადაწევას დაჩქარებული წესით განიხილავენ. ინიციატივას კომიტეტის გადაწყვეტილების მიუხედავად, პირველივე პლენარულ სხდომაზე განიხილავენ. კანონპროექტის ავტორია ეკა ბესელია 8 ქართული ოცნების დეპუტატთან ერთად.