NATO-ს გენერალურმა მდივანმა, იენს სტოლტენბერგმა, 7 სექტემბერს, თბილისში ვიზიტისას განაცხადა, რომ ნატო მხარს უჭერს საქართველოს ტერიტორიულ მთლიანობასა და მის სუვერენიტეტს. გარდა ამისა, სტოლტენბერგმა 8 ოქტომბრის საპარლამენტო არჩევნების მნიშვნელობასაც გაუსვა ხაზი:

"ჩრდილოატლანტიკური საბჭოს ვიზიტი სერიოზული გზავნილია მსოფლიოსათვის, რომ ნატო მტკიცედ უჭერს მხარს საქართველოს ტერიტორიულ მთლიანობას და მის სუვერენიტეტს. ის ასევე აგზავნის ინფორმაციას უწყვეტ და ძალიან მჭიდრო პარტნიორობაზე. იმის გათვალისწინებით, რომ საქართველოში მომავალ თვეს გაიმართება საპარლამენტო არჩევნები, მინდა გამოვიყენო შესაძლებლობა და ძალიან მაღალი შეფასება მივცე ყველა პარლამენტარის მოღვაწეობას საქართველოს დემოკრატიული ინსტიტუტების გაძლიერების თვალსაზრისით".

ჩრდილოატლანტიკური საბჭოს ვიზიტი საქართველოში მეოთხედ იმართება. ვიზიტის ფარგლებში ნატოს გენერალური მდივანი საქართველოს პარლამენტის ეროვნულ ბიბლიოთეკაში სიტყვით გამოვა და სტუდენტების კითხვებს უპასუხებს.