თიბისი ბანკის ხელმძღვანელი პირების, მამუკა ხაზარაძისა და ბადრი ჯაფარიძის გადაყენების მოთხოვნის შესახებ განცხადების გამოქვეყნებიდან ერთ წუთში ბანკის აქციების ფასი 3,8 პროცენტით დაეცა.

ბანკის განცხადება, ლონდონის დროით, 13:59-ზე გამოქვეყნდა. ამ დროისთვის ბანკის ერთ აქციის ფასი 14,26 გირვანქა სტერლინგი იყო. განცხადების გამოქვეყნების შემდეგ, 14:00 საათზე კი 13,72 გირვანქა სტერლინგამდე დაეცა.

ამ დროის მონაცემებით (საქართველოს დროით, 19:50) დღის განმავლობაში ბანკის საბაზრო მოცულობა 4,58 პროცენტით შემცირდა.

თიბისის ხელმძღვანელი პირების გადაყენების მოთხოვნაზე ინფორმაცია ეროვნულმა ბანკმა დაახლოებით ერთი საათის წინ გაავრცელა. მათივე განმარტებით, თიბისი ბანკის აქციონერთა კრებას მიეცა 2-თვიანი ვადა მათი სამეთვალყურეო საბჭოდან გაწვევისათვის. გადაწყვეტილება არ ეხება არცერთი აქციონერის საკუთრებაში არსებულ წილებს ბანკში.

თიბისი ბანკის განცხადებით, აპირებენ სამართლებრივი საშუალებები გამოიყენონ ბანკისა და აქციონერების ინტერესების დასაცავად.

8 იანვარს გავრცელდა ინფორმაცია, რომ პროკურატურამ თიბისი ბანკიდან დოკუმენტები ამოიღო. თიბისი ბანკმა დოკუმენტების ამოღებასთან დაკავშირებით პროკურატურას 9 იანვარს უპასუხა და გავრცელებული ინფორმაციას "მიზანმიმართული დისკრედიტაციისა და რეპუტაციის შელახვის მცდელობა" უწოდა.

ბანკის განცხადებაში ნათქვამი იყო, რომ პროკურატურის მიერ ამოღებული დოკუმენტები ეხება 2008 წლის რიგით, კანონიერ საბანკო ოპერაციას. ბანკში On.ge-ს განუცხადეს, რომ საქმე ეხება კერძო კლიენტის საბანკო ოპერაციას, რასაც ვერ გაასაჯაროვებენ. პროკურატურაში არ ამბობდნენ, რა საქმესთან დაკავშირებით ამოიღეს ბანკიდან ინფორმაცია, თუმცა განმარტავდნენ, რომ დოკუმენტები ომეგა ჯგუფის საქმეს არ ეხებოდა.