ილიას სახელმწიფო უნივერისტეტში დაწყებული რეორგანიზაციის შემდეგ, რის გამოც გიორგი ქადაგიძე ბიზნესსკოლის დეკანი აღარ არის, მაია სიდამონიძემ უნივერსიტეტის ტურიზმის ცენტრის ხელმძღვანელის პოზიცია დატოვა. ქადაგიძემ 2019 წლის პირველ თებერვალს Facebook-ზე დაწერა, რომ უნივერსიტეტისთვის ცვლილებები და ძირეული სიახლეები მიუღებელია და თანამდებობიდან მოხსნეს.

"დღეს ხარისხიანი განათლება ყველაზე მნიშვნელოვანი გამოწვევაა ქვეყანაში. სწორედ ამ მიზეზით, ერთი წლის წინ შევუერთდი გიორგი ქადაგიძის გუნდს ილიას სახელმწიფო უნივერსიტეტში. მე სრულიად ვიზიარებდი მის გეგმებსა და ხედვას, რაც ჩემთვის დიდი მოტივაცია და იმედი იყო, რომ ჩვენ ერთად შევცვლიდით ბევრ რამეს უკეთესობისკენ მიუხედავად იმისა რომ კარგად ვაცნობიერებდი მოსალოდნელ ბიუროკრატიულ დაბრკოლებებს", — წერს სიდამონიძე.

მისივე განმარტებით, ის კატეგორიულად არ ეთანხმება იმ სტრუქტურული ცვლილებების შინაარსსა და ფორმას, რაც ბიზნესსკოლაში განხორციელდა.

"ეს ყველაფერი პირველ რიგში მეტყველებს ამ სფეროში უფრო სიღრმისეულ პრობლემებზე, ვიდრე წარმომედგინა, სადაც ჩვენი მომავალი თაობის ინტერესი და კეთილდღეობა ზიანდება. მე დიდი მადლობა მინდა გადავუხადო გიორგი ქადაგიძეს გამოცხადებული ნდობისთვის, ასევე სტუდენტებსა და ლექტორებს თანამშრომლობისთვის", — აღნიშნავს სიდამონიძე.

2 თებერვალს, გიორგი ისაკაძემ ილიას სახელმწიფო უნივერსიტეტი დატოვა. ის ილიაუნის ბიზნესსკოლის ასოცირებული პროფესორი იყო. 5 თებერვალს გიორგი პაპავამ თქვა, რომ გიორგი ქადაგაძის მხარდაჭერის გამო ილიას უნივერსიტეტის ბიზნესსკოლის ხარისხის მართვის უფროსის თანამდებობიდან გაათავისუფლეს.