პრემიერმინისტრმა, გიორგი კვირიკაშვილმა მაკკეინის ინსტიტუტის წარმომდგენლის, დევიდ კრამერის მიერ მედიაზე და კონკრეტულად რუსთავი 2-ზე დასმულ შეკითხვას უპასუხა და განმარტა, რომ აღნიშნული ტელევიზიის მფლობელების საქმეში მთავრობა არ ერევა.

მან ასევე განაცხადა, რომ ხელისუფლება დაინტერესებულია, რომ სამაუწყებლო კომპანია რუსთავი 2 უცვლელი დარჩეს და არხის ირგვლივ მიმდინარე მოვლენები ზოგიერთი პოლიტიკოსის მიერ ატეხილ ხმაურად შეაფასა:

"რუსთავი 2-ის საქმეს აქვს ორი განზომილება. პირველი მის მფლობელობას უკავშირდება. ჩვენ ვერც ჩავერევით და არც ვაპირებთ ჩავერიოთ სასამართლოს საქმეში. არსებობს მეორე მიმართულებაც - მედიის თავისუფლება. ჩემი პრემიერობის პერიოდში და წინა პოსტზე ყოფნის დროსაც, ათობით განცხადება გავაკეთე რუსთავი 2-ის მხარდასაჭერად. შევთავაზე სხვადასხვა ინსტრუმენტი - შექმნილიყო მედია ბორდი, რომელიც სამოქალაქო საზოგადოების ლიდერების, არასამთავრობოებისა და მედია სპეციალისტებით იქნებოდა დაკომპლექტებული, რომ უზრუნველყოფილი ყოფილიყო მისი სარედაქციო პოლიტიკა და არა ობიექტურობა. ეს არ არის ჩვენი მიზანი. ამის საუკეთესო მაგალითი საზოგადოებრივი მაუწყებელია, რომელიც უფრო კრიტიკულია ზოგჯერ ვიდრე რუსთავი 2".

კვირიკაშვილმა აღნიშნულლი განცხადება თბილისის საერთაშორისო კონფერენციაზე - ევროპის ცვალებადი გეოსტრატეგიული ლანდშაფტი ვარშავის სამიტის ფარგლებში გააკეთა.