რუსთავი 2-ის ჟურნალისტის, დავით ერაძის საცხოვრებელ სახლს ესროლეს. ამის შესახებ ინფორმაცია ტელეკომპანია რუსთავი 2-მა გაავრცელა.

ტელეკომპანიის ცნობით, დაზიანებულია სახლის კარი, ტყვიის მასრა კი აივანზე გდია.

რუსთავი 2 წერს, რომ დავით ერაძის ერთ-ერთი ბოლო სიუჟეტი მოჭიდავეების საქმის სკანდალს ეხებოდა. სწორედ დავით ერაძემ მოიპოვა ვიდეო-მასალა, რომელიც ევროპის ჩემპიონსა და ფედერაციის პრეზიდენტს შორის კონფლიქტს ასახავს, კადრებში ჩანდა, როგორ გაუსწორდა გეგა გეგეშიძე ევროპის ჩემპიონს. სიუჟეტის ეთერი გასვლის შემდეგ სამართალდამცველებმა გეგა გეგეშიძე დააპატიმრეს.

როგორც შსს-ში On.ge-ს უთხრეს, საქმეზე გამოძიება სისხლის სამართლის კოდექსის 236-ე მუხლით მიმდინარეობს, რაც ცეცხლსასროლი იარაღის მართლსაწინააღმდეგო შეძენა-შენახვა-ტარებას გულისხმობს.