სოსო ჯოხაძის მკვლელობის ბრალდებით დაკავებულს ბრალი გვიან ღამით წაუყენეს. დაკავებულის ადვოკატი ლევან პატარქალიშვილი რუსთავი 2-თან საუბრისას აცხადებს, რომ ბრალდებულ ბადრი ნათენაძეს დაზიანებები აღენიშნება:

"მას ხელზე და სხეულზე აღენიშნება დაზიანებები, რომლებიც, მისი თქმით, დაკავების შემდეგ მიიღო".

დაკავებულს ბრალი სისხლის სამართლის 109-ე მუხლით წაუყენეს, რაც დამამძიმებელ გარემოებაში განზრახ მკვლელობას გულისხმობს.

დაკავებულისთვის აღკვეთი ღონისძიების საკითხზე სასამართლო სავარაუდოდ დღეს იმსჯელებს. ადვოკატის თქმით, ბრალდებული დანაშაულს არ აღიარებს და დუმილის უფლებას იყენებს. პატარქალიშვილი დაკავებულისთვის ექსპერტიზის ჩატარებასაც მოითხოვს.