სატელეკომუნიკაციო კომპანია ბილაინი მისი გაყიდვის შესახებ გავრცელებულ ინფორმაციას განცხადებით პასუხობს. პრესსამსახურის მიერ გავრცელებულ განცხადებაში არ არის განმარტებული იგეგმება თუ არა მისი გაყიდვა და ძირითადი აქცენტი განხორციელებულ ინვესტიციებზეა.

"ბილაინი დიდი ჯგუფის ნაწილია და როგორც ნებისმიერი მსგავსი ზომის ჯგუფის შემთხვევაში, შეიძლება მოხდეს კომპანიების ყიდვა და გაყიდვა - ეს ბიზნესის წარმართვის ჩვეულებრივი ნაწილია. ამ ეტაპზე გაყიდვის წინადადება არ არსებობს და კომპანია განაგრძობს განვითარებას", — აღნიშნულია ბილაინის განცხადებაში.

საქართველოს კომუნიკაციების ეროვნული კომისიის თავმჯდომარის, კახა ბექაურის თქმით, ბილაინს გადაწყვეტილი აქვს, რომ საქართველოს ბაზარი დატოვოს. ბექაურის კომენტარს უწყების პრესსამსახური ავრცელებს.

"ისიც ყიდის ბიზნესს, შესაბამისად, მისი მხრიდანაც არ ხდება კონკურენციაში შესვლა", — აღნიშნა ბექაურმა ბილაინზე საუბრისას.

კომუნიკაციების კომისიის თავმჯდომარემ ბილაინზე საუბარი საქართველოს სატელეკომუნიკაციო ბაზარზე კონკურენციის შესუსტებაზე საუბრისას გაამახვილა ყურადღება. მისი თქმით, არსებობს რისკი, რომ "მნიშვნელოვანი ძალაუფლების მქონე ოპერატორებმა თავისი ძალაუფლების ბოროტად გამოყენება სცადონ".