თბილისის საქალაქო სასამართლოში ქურდული სამყაროს წევრობისთვის ბრალდებულ ორ პირს 7-7 წლით, ხოლო კიდევ ერთს 6 წლით და 6 თვით თავისუფლება აღკვეთა მიუსაჯეს.

ბრალდების მხარის მტკიცებით, დაკავებულები ქურდულ სამყაროში დადგენილი სპეციალური წესების შესაბამისად მოქმედებდნენ და სისტემატური კავშირი ჰქონდათ საზღვარგარეთ მყოფ კანონიერ ქურდებთან. პროკურატურის ინფორმაციით, 2018 წლის აპრილში ბრალდებულებმა კანონიერი ქურდების დავალებით, მუქარითა და დაშინებით ერთ-ერთი დაზარალებულისგან ე.წ. ქურდული წილის – 60 ათასი ლარის გამოძალვას ცდილობდნენ.

სამართალდამცველებმა ორი პირი თბილისში, ხოლო კიდევ ერთი სიღნაღის რაიონის სოფელ ანაგაში 19 აპრილს დააკავეს. მათ ბრალდება საქართველოს სისხლის სამართლის კოდექსის 2231-ე მუხლის პირველი ნაწილით (ქურდული სამყაროს წევრობა (2018 წლის 1 მაისამდე რედაქციით)) წარედგინათ.