საქართველოს პარლამენტის დეპუტატი, დავით ჭიჭინაძე აცხადებს, რომ იურიდიულ საკითხთა კომიტეტის ყოფილ თავმჯდომარესთან ეკა ბესელიასთან დაპირისპირება 2017 წელს კონსტიტუციის თემით დაიწყო. ჭიჭინაძის თქმით, გუნდში დაპირისპირების პროვოცირებას ბიძინა ივანიშვილი ახდენდა.

"ეკა ბესელიას არ დაუწყია ეს დაპირისპირება. ჩემი დაპირისპირებაც ზუსტად იმიტომ იყო, რომ ეს გუნდი დაუპირისპირდა ჯერ ბესელიას მერე კვირიკაშვილს, თუ ამ ადამიანებთან შეიძლება დაპირისპირება ე.ი. ბიძინა ივანიშვილისგან ყოფილა წახალისებული ეს დაპირისპირება. ყველაფერი უნდა ითქვას მაშინ.

თქვენ გახსოვთ ორჯერ დემონსტრაციულად კოლექტიურმა ზარდიაშვილებმა ბესელიას მიუტოვეს კომიტეტი, გახსოვთ ეს და იქიდან დაიწყო დაპირისპირება, თუნდაც კონსტიტუციის ჩანაწერებთან მიმართებით. მათ უნდოდათ, რომ იუსტიციის საბჭოში თუნდაც დაკომპლექტების წესი შეეცვალათ და იქ პარლამენტი არ ჩარეულიყო, შემდეგ უნდოდათ, რომ მოსამართლეების დანიშვნაში პარლამენტს საერთოდ არ მიეღო მონაწილეობა და პირდაპირ იუსტიციის საბჭოს დაენიშნა ისინი", — განაცხადა დავით ჭიჭინაძემ.

კითხვაზე შეიძლება თუ არა დადგეს ეკა ბესელიას პარტიიდან გაშვების საკითხი, დავით ჭიჭინაძე ამბობს, რომ, რაც უფრო მეტ სიმართლისმთქმელს გაუშვებს ქართული ოცნება, მით უფრო დამძიმდება მისი მდგომარეობა.