ქართული ოცნების დეპუტატის, ბექა ნაცვლიშვილის განცხადებით, იურიდიულ საკითხთა კომიტეტიდან გედევან ფოფხაძის გაწვევამ დატოვა შთაბეჭდილება, რომ ეს იყო მიზანმიმართული ქმედება. დეპუტატის თქმით, ის არ იზიარებს ფორმას, რომლითაც უმრავლესობამ გედევან ფოფხაძეს კომიტეტის პირველი მოადგილის უფლებამოსილება შეუჩერა.

"ამ გადაწყვეტილებამ არ დატოვა ჩემში ის შთაბეჭდილება, თითქოს ეს იყო შესაძლო პროცედურული დარღვევების გამო მიღებული გადაწყვეტილება, არამედ ეს იყო მიზანმიმართული ქმედება გედევან ფოფხაძის მიმართ. გარკვეული თვალსაზრისით დასჯა გამოვიდა ფოფხაძის. ვერ გავიზიარებ ამ გადაწყვეტილებას მიუხედავად იმისა, რომ ეს არ არის ჩემი ფრაქცია. ჩემთვის ყველაზე მნიშვნელოვანია, რომ იურიდიულ კომიტეტს ხელმძღვანელობდეს ადამიანი, რომელსაც ცხადი პოზიცია აქვს მოსამართლეთა სიის მიმართ", — განაცხადა ბექა ნაცვლიშვილმა.

დეპუტატი ამბობს, რომ გედევან ფოფხაძე იყო ის ადამიანი, რომელიც გამოხატავდა თავის პოზიციას უზენაესი სასამართლოს მოსამართლეობის კანდიდატებზე, ანრი ოხანაშვილის მკაფიო პოზიცია კი, რომელიც იურიდიულ საკითხთა კომიტეტის თავმჯდომარის პოსტზე განიხილება, ამ საკითხზე არ იცის.

"არ არის მკაფიო ანრი ოხანაშვილის პოზიციები მოსამართლეებთან დაკავშირებით, ყოველ შემთხვევაში მისი მკაფიო პოზიცია მათ მიმართ არ მსმენია. ეს იქნება ძალიან სამწუხარო ფაქტი, თუ იურიდიულ კომიტეტს უხელმძღვანელებს ადამიანი, რომელსაც მკაფიო პოზიციები არ აქვს ამ მოსამართლეებთან დაკავშირებით", — განაცხადა ბექა ნაცვლიშვილმა.

3 იანვარს ფოფხაძეს ქართული ოცნების ფრაქციამ იურიდიულ საკითხთა კომიტეტი დაატოვებინა და შესაბამისად, ის აღარ არის კომიტეტის თავმჯდომარის პირველი მოადგილე.

პარლამენტის დეპუტატის, მამუკა მდინარაძის განცხადებით, გედევან ფოფხაძე იურიდიულ საკითხთა კომიტეტიდან ორი მიზეზით გაიწვიეს — პროცედურული დარღვევები და შეუთანხმებელი კანდიდატურა.

მდინარაძის განმარტებით, ფოფხაძე კომიტეტის პირველ მოადგილედ რეგლამენტის დარღვევით აირჩიეს, გარდა ამისა მისი კანდიდატურა ფრაქციასთან შეუთანხმებელი იყო.

ეკა ბესელია ამბობს, რომ ფოფხაძის კომიტეტიდან გაწვევით მის მიმართ უმრავლესობამ სადამსჯელო ღონისძიება გაატარა. ოცნებაში დაპირისპირება სწორედ ბესელიას მიერ თანამდებობის დატოვების შემდეგ დაიწყო.

დაპირისპირება ქართულ ოცნებაში

იურიდიულ საკითხთა კომიტეტის თავმჯდომარე, ეკა ბესელია თანამდებობიდან 27 დეკემბერს გადადგა. მისი თქმით, ამით უზენაესი სასამართლოს მოსამართლეების დამტკიცებას შეუშალა ხელი.

მიუხედავად იმისა, რომ დღემდე არ არსებობს პროცედურა, რომლითაც იუსტიციის უმაღლესმა საბჭომ მოსამართლეობის კანდიდატები უნდა შეარჩიოს, უზენაესი სასამართლოს მოსამართლეობის 10 კანდიდატი უკვე წარდგენილია. ამის გამო, არასამთავრობო ორგანიზაციების ნაწილსა და საბჭოს არამოსამართლე წევრებს პროცესის ობიექტურობასა და მიუკერძოებლობაზე კითხვები უჩნდებათ.

ეკა ბესელიას გადადგომას მმართველ გუნდში დაპირისპირება მოჰყვა. პარლამენტის თავმჯდომარის, ირაკლი კობახიძის თქმით, ბესელიას გადადგომის მიზეზები პარტიის შიდა სამზარეულოა, რომელსაც ნაწილობრივ გარეთ გამოიტანეს.

იურიდიულ საკითხთა კომიტეტის პირველ მოადგილედ გედევან ფოფხაძე 31 დეკემბერს აირჩიეს. საქართველოს პარლამენტის თავმჯდომარე ფიქროს, რომ მისი არჩევა რეგლამენტის დარღვევით მოხდა. ეკა ბესელიას თქმით, რეგლამენტს კარგად იცნობს და იმოქმედა წესების შესაბამისად.

ამასთანავე, პარლამენტის თავმჯდომარემ განაცხადა, რომ თუ ვინმე წავა ქართული ოცნების გუნდის წინააღმდეგ, ამას პასუხი აუცილებლად გაეცემა.