ქართული ოცნების დეპუტატის, ლევან გოგიჩაიშვილის განცხადებით, იუსტიციის უმაღლესმა საბჭომ უზენაესი სასამართლოს მოსამართლეების კანდიდატურების სია შემოაპარა, სადაც უმეტესობა ადეიშვილის კლანის მსახურები არიან.

"ჩვენ გუშინ იურიდიულმა კომიტეტმა ჩავაგდეთ პროცესი, სადაც გვაპარებდნენ ჩინჩალაძეს და მის მაგვარ ადამიანებს, რომლებიც იყვნენ პირდაპირი მნიშვნელობით მსახურები ადეიშვილის რეჟიმის. როგორ დარჩნენ ეს არ ვიცი და ამაში მონაწილეობა არ მიმიღია,. მე ვიღებ პასუხისმგებლობას იმ პოლიტიკურ პროცესზე, რასაც ჰქვია ჩემი მონაწილეობა ამ პროცესში", — განაცხადა ლევან გოგიჩაიშვილმა.

მისი თქმით, არ სურს კომიტეტს ჰყავდეს თავმჯდომარე ისეთი, ვინც დღეს არჩევნები რომ ყოფილიყო ჩინჩალაძეს მისცემდა ხმას.

"ასე დგას დღეს საკითხი, იურიდიულ კომიტეტს სჭირდება პროცესი, სადაც ეს ადამიანები შემოპარული სიით ვერ გავლენ. ამ წამს არის მორალური კონფლიქტი იუსტიციის საბჭოსა და საზოგადოებას შორის , ასევე არის ინსტიტუციური კონფლიქტი პარლამენტსა და იუსტიციის საბჭოს შორის და გაღრმავდება იქამდე, სანამ ეს პირები არიან იუსტიციის საბჭოში", — განაცხადა ლევან გოგიჩაიშვილმა.

დღეს, 27 დეკემბერს იურიდიულ საკითხთა კომიტეტის თავმჯდომარე, ეკა ბესელია გადადგა. მისი თქმით, ამით უზენაესი სასამართლოს მოსამართლეების დამტკიცებას შეუშალა ხელი. მისი განმარტებით, ის მას შემდეგ გადადგა, რაც მისმა მოადგილემ, ვანო ზარდიაშვილმა თანამდებობების დატოვების მოთხოვნით მიმართა. ბესელიას გადადგომის შემდეგ ზარდიაშვილს მოუწევდა ამ თანამდებობაზე მუშაობა.

იუსტიციის უმაღლესმა საბჭომ უზენაესი სასამართლოს მოსამართლეობის 10 კანდიდატი წარადგინა. ამის მიუხედავად, დღემდე არ არსებობს პროცედურა, რომლითაც იუსტიციის უმაღლესმა საბჭომ მოსამართლეობის კანდიდატები უნდა წარადგინოს. ამ მიზეზით, არასამთავრობო ორგანიზაციების ნაწილსა და საბჭოს არამოსამართლე წევრებს პროცესის ობიექტურობასა და მიუკერძოებლობაზე კითხვები უჩნდებათ.

დასახელებულ კანდიდატებს შორის არიან: თამარ ალანია; მერაბ გაბინაშვილი; დიმიტრი გვრიტიშვილი; გიორგი მიქაუტაძე; ნინო სანდოძე; პაატა სილაგაზე; გიორგი ტყავაძე; ნინო ქადაგიძე; მიხეილ ჩინჩალაძე; მარიამ ცისკაძე.

იუსტიციის საბჭოს არამოსამართლე წევრი, ნაზი ჯანეზაშვილი და არასამთავრობო სექტორის ნაწილი მათ "ჩინჩალაძის კლანად" მოიხსენიებს.

ამავე თემაზე: სასამართლოს სუიციდად შეფასებული გადაწყვეტილება და უვადო მოსამართლეობის 10 კანდიდატი