მარკ დევიდ ჩეპმენს, რომელმაც 36 წლის წინ ჯონ ლენონი მოკლა, ვადაზე ადრე გათავისუფლებაზე კიდევ ერთხელ უთხრეს უარი.

CNN-ის ცნობით, კომიტეტმა, რომელსაც მსჯავრდებულის თხოვნის საფუძველზე გადაწყვეტილება გამოაქვს, განაცხადა, რომ ჩეპმენის მიერ ჩადენილ სერიოზულ დანაშაულს მისი გათავისუფლებით მნიშვნელობა შეუმცირდებოდა.

1980 წლის 8 დეკემბერს ჩეპმენი ლენონს მანჰეტენზე ჩაუსაფრდა, სადაც ბითლზის ყოფილი წევრი ცოლთან, იოკო ონოსთან, და შვილთან, შონთან, ერთად ცხოვრობდა.

როდესაც ჯონ ლენონი იოკოსთან ერთად სახლს ტოვებდა, ჩეპმენმა მას ავტოგრაფი სთხოვა და მიიღო კიდეც. ამის შემდეგ, ჩეპმენმა ღამემდე მოიცადა, სანამ წყვილი შინ დაბრუნდებოდა და ჯონ ლენონს ზურგიდან რევოლვერით ხუთჯერ ესროლა.

"ქრისტემ სიმშვიდე მაპოვნინა, მას მე ვუყვარვარ, მან მე მაპატია და დამეხმარა ისე, რომ თქვენ ვერც წარმოიდგენთ" - განაცხადა ჩეპმენმა 2014 წელს, როდესაც მერვედ მიიღო უარი შეწყალებაზე.

61 წლის ჩეპმენი 2 წლის შემდეგ ისევ შეძლებს, რომ ვადაზე ადრე გათავისუფლება ითხოვოს.