გორში 14 წლის წინ გაუჩინარებული 12 წლის ბიჭის ცხედრის სამძებრო სამუშაოები განახლდა. ამის შესახებ ინფორმაცია On.ge-ს შინაგან საქმეთა სამინისტროში განუცხადეს. უწყების ცნობით, გორის პარკში სამართალდამცველებმა ორი კარავი გაშალეს. იქ, სადაც მწვანე კარავია გაშლილი სამართალდამცველების მეთვალყურეობით მიწა გაითხრება.

On.ge-ს უწყებაში უთხრეს, რომ სამძებრო სამუშაოები 9 წლის გოგოს მკვლელობაში ბრალდებულის, იაგო ნებიერიძის დამატებითი ჩვენების საფუძველზე დაიწყო.

"უკვე ჩატარებულია საგამოძიებო ექსპერიმენტი, რა დროსაც იაგო ნებიერიძემ მოზარდის სხეულის სავარაუდო ადგილსამყოფელი მიუთითა. პოლიციამ დაუყოვნებლივ დაიწყო მითითებული ტერიტორიის შემოწმება. ადგილზე უკვე ჩატარდა გეოსკანირება, რომელმაც პოლიციას დამატებითი ინფორმაცია მისცა ნიადაგზე სხვადასხვა დროს განხორციელებული ზემოქმედების შესახებ", — აცხადებენ შსს-ში.

უწყებაში განგვიმარტეს, რომ დადგენილია რამდენიმე სავარაუდო ლოკაცია, სადაც ამჟამად მიწის გათხრის სამუშაოები მიმდინარეობს.

იაგო ნებიერიძეს გორში მიმდინარე წლის 25 ოქტომბერს გაუჩინარებული 9 წლის ნანა ბერიაშვილის გატაცებასა და მკვლელობაში ედება ბრალი. ბავშვის ცხედარი იმავე დღეს საღამოს მდინარე ლიახვის ნაპირზე იპოვეს. ახლობლები ყვებიან, რომ გოგო ხელ-ფეხშეკრული იპოვეს.

გამოძიება წინასწარი შეცნობით არასრულწლოვნის მიმართ დამამძიმებელ გარემოებაში ჩადენილი განზრახ მკვლელობის ფაქტზე, საქართველოს სისხლის სამართლის კოდექსის 109-ე მუხლის მე-2 ნაწილის "ბ" ქვეპუნქტით მიმდინარეობს. გარდა ამისა, ბრალდებულს ბრალი დაუმძიმდა სისხლის სამართლის კოდექსის 141-ე მუხლით დაუმძიმდა, რაც გარყვნილ ქმედებას გულისხმობს.

ამასთანავე გამოძიება გრძელდება 14 წლის წინ გაუჩინარებული 11 წლის მოზარდის საქმეზეც.

შეწყალების კომისიის თავმჯდომარის, ზვიად ქორიძის განცხადებით, 9 წლის გოგოს მკვლელობაში ბრალდებული შეწყალებული იყო.