შინაგან საქმეთა სამინისტროს ცნობით, განზრახ მკვლელობის ბრალდებით, დაკავებულია 1993 წელს დაბადებული პირი.

უწყება გავრცელებულ განცხადებაში არ აკონკრეტებს, თუ როდის მოხდა მკვლელობა. შსს წერს, რომ დანაშაული თბილისში, ვაჟა-ფშაველას ქუჩაზე, დროებით საცხოვრებელ სახლში მოხდა. გამოძიების ვერსიით, ამავე მისამართზე მცხოვრებ ბინის მფლობელს — 1973 წელს დაბადებულ ს.ა.-ს, ბრალდებულმა ცივი იარაღით სასიკვდილო ჭრილობა მიაყენა.

უწყების განცხადებით, მიმდინარეობს საგამოძიებო მოქმედებები დანაშაულის მოტივის და სხვა ფაქტობრივი გარემოებების დასადგენად.

გამოძიება განზრახ მკვლელობის ფაქტზე, საქართველოს სსკ-ს 108-ე მუხლით მიმდინარეობს. დანაშაული 7-დან 15 წლამდე ვადით თავისუფლების აღკვეთას ითვალისწინებს.