პროკურატურის განცხადებით, საერთაშორისო გამჭვირვალობა-საქართველოდან ეკა გიგაურმა და საქართველოს ახალგაზრდა იურისტთა ასოციაციიდან ირმა პავლიაშვილმა გამოძიებასთან არ ითანამშრომლეს. კერძოდ, არ განაცხადეს, თუ ვინ აცნობა მათ ყალბი პირადობის დამადასტურებელი მოწმობების დამზადების შესახებ.

უწყების განცხადებით, გიგაურმა და პავლიაშვილმა ინფორმაციის გაცემის უარი მიზეზად წყაროს უსაფრთხოება დაასახელეს. პროკურატურაში ამბობენ, რომ გიგაურმა გამოძიებას არც ნახსენები თათბირის ადგილმდებარეობისა და მასში მონაწილე პირებისა და არც ვიდეოკამერების განთავსების ადგილზე მიაწოდა ინფორმაცია.

"სისხლის სამართლის საპროცესო კოდექსის 75-ე, 76-ე მუხლების თანახმად, მოწმის ჩვენება მტკიცებულება ვერ იქნება, თუ იგი ვერ მიუთითებს წარმოდგენილი ინფორმაციის წყაროს. ამასთან, ირიბი ჩვენება დასაშვები მტკიცებულებაა მხოლოდ იმ შემთხვევაში, თუ ირიბი ჩვენების მიმცემი პირი (ეკა გიგაური) მიუთითებს ინფორმაციის წყაროს, რომლის იდენტიფიცირება და რეალურად არსებობის შემოწმება შესაძლებელია", — წერია პროკურატურის განცხადებაში.

უწყება განმარტავს, რომ გიგაური და პავლიაშვილი ვალდებულები არიან საქმისთვის მნიშვნელოვანი ინფორმაცია გასცენ და მათი ქმედება აღიქმება, როგორც მოწმის უარი, ნებაყოფლობით მიაწოდონ გამოძიებას ინფორმაცია. ამის გათვალისწინებით, პროკურატურა იმსჯელებს, მიმართოს სასამართლოს მაგისტრატი მოსამართლის წინაშე დასახელებულ მოწმეთა დაკითხვის თაობაზე.

ეკა გიგაურმა გამოკითხვიდან გამოსვლის შემდეგ განაცხადა, რომ მათ წყაროს დასახელება არ ევალებათ. მისივე თქმით, მიღებული ინფორმაციის ნაწილი გადაამოწმეს.

"ჩვენ დავასახელეთ კონკრეტული ადამიანები, დავასახელეთ ადგილი, სადაც ჩატარდა ეს თათბირი, ვინ ესწრებოდა ამ თათბირს და ა.შ. გადამოწმებაში ვგულისხმობთ, ეს ადამიანები მუშაობენ თუ არა ადგილებზე და მივლინებულები იყვნენ თუ არა სხვაგან და მათ მოვალეობას ასრულებენ თუ არა სხვა პირები", — აღნიშნა გიგაურმა.

20 ნოემბერს სამმა არასამთავრობო ორგანიზაციამ განაცხადა, რომ საპრეზიდენტო არჩევნების მეორე ტურისთვის სალომე ზურაბიშვილის მხარდასაჭერად, სავარაუდოდ, ყალბი პირადობის მოწმობები იბეჭდება. მათივე თქმით, ამის შესახებ ინფორმაცია მათ სახელმწიფო სერვისების განვითარების სააგენტოში დასაქმებულმა ერთ-ერთმა თანამშრომელმა მიაწოდა. სავარაუდოდ, ყალბი პირადობის მოწმობების დამზადებაზე პროკურატურამ გამოძიება დაიწყო. დღეს, 21 ნოემბერს არასამთავრობო ორგანიზაციების დირექტორები გამოკითხვაზე იყვნენ დაბარებულები.