ევროპული საქართველოს ვარკეთილის ორგანიზაციის რამდენმე წევრმა პარტია დატოვა. როგორც ორგანიზაციის უკვე ყოფილი ხელმძღვანელი, აკაკი ბელთაური აცხადებს, პარტიის დატოვების მიზეზი საპრეზიდენტო არჩევნების მეორე ტურში, გაერთიანებული ოპოზიციის მხარდაჭერაა.

ბელთაური ამბობს, რომ ამ გადაწყვეტილების შესახებ მათთან არავის უსაბრია და ის ყველაფერს გააკეთებს, რომ ნაციონალური მოძრაობა ხელისუფლებაში არ მოვიდეს.

"მე რომ მდომებოდა ნაციონალურ მოძრაობაში, ბუნებრივია, ვიქნებოდი ნაციონალურ მოძრაობაში", — ამბობს ბელთაური იმედის ეთერში გასულ სიუჟეტში.

როგორც ევროპული საქართველოს სამგორის რაიონული ორგანიზაციის ხელმძღვანელმა, დავით ჟღენტმა On.ge-სთან საუბარში აღნიშნა, მნიშვნელოვანი არის ის, რომ ვარკეთილის მოსახლეობამ უკვე მისცა ხმა სალომე ზურაბიშვილის და ქართული ოცნების წინააღმდეგ.

ჟღენტი ამბობს, რომ გადაწყვეტილებასთან დაკავშირებით მას ბელთაურთან კონსულტაციები ჰქონდა და იქამდე არსებობდა მემორანდუმიც, რომლითაც ვალდებულება აიღეს, რომ მეორე ტურში გასულ ოპოზიციას მხარს დაუჭერდნენ.

"რა თქმა უნდა, ჩვენ ნაციონალურ მოძრაობასთან არ ვერთიანდებით, ჩვენ უბრალოდ მხარს ვუჭერთ მეორე ტურში", — თქვა ჟღენტმა.

დავით ჟღენტი ამბობს, რომ ჯერჯერობთ არ იცის, თუ რამდენმა ადამიანმა დატოვა პარტია.