ქართული ოცნების თავმჯდომარე, ბიძინა ივანიშვილი არჩევნების მეორე ტურის წინ მოქალაქეებს მიმართავს. ივანიშვილი აცხადებს, რომ ქვეყანა დგას განსაცდელის წინაშე და ეს განსაცდელი ხელისუფლებამ თავად დაუშვა.

მმართველი პარტიის ლიდერი აცხადებს, რომ არჩევნებზე მათი მოწინააღმდეგე არა პოლიტიკური პარტია არამედ, რევანშისთვის გაერთიანებული მოძალადეები არიან. მისი თქმით, ამის მიზეზი არის ის, რომ ხელისუფლება დაშორდა ხალხს და მათი ნდობა დაკარგა.

ივანიშვილის ვიდეომიმართვა ქართულმა ოცნებამ გაავრცელა:

ქართული ოცნების "ამომრჩეველთან შერიგება"

არჩევნების შედეგების გამოცხადების შემდეგ პრემიერ მინისტრმა მამუკა ბახტაძემ განაცხადა, რომ ხელისუფლებამ ქართული საზოგადოებისგან მიიღო მკაფიო გზავნილი მათ დაშვებულ შეცდომებზე. ამიტომ, მეორე ტურის წინ მმართველმა პარტიამ "ამომრჩეველთან შერიგება" გადაწყვიტა.

პარტიის ოფისში ივანიშვილთან ერთად შეკრებილებმა ამისთვის სხვადასხვა გზები განიხილეს. მაგალითად, დეპუტატმა კარლო კოპალიანმა განაცხადა, რომ თუ "ხალხს მოეფერებიან" და მათი პრობლემებით დაინტერესდებიან, მეორე ტურში აუცილებლად გაიმარჯვებენ.

პრემიერმა კი მთავრობის სხდომაზე განაცხადა, რომ სოციალურად დაუცველ ბავშვებს დახმარებას 10 ლარიდან 50 ლარამდე გაუზრდიან.

ხელისუფლებამ გაითვალისწინა საქართველოს საპატრიარქოს ინტერესებიც და პატრიარქთან შეთანხმებით, მეორე ტურის წინ მარიხუანის კულტივაციის კანონპროექტი გაიწვია. კიდე ერთი ინიციატივა, რომელიც მეორე ტურის წინ მმართველმა გუნდა დააანონსა საკონსტიტუციო სასამართლოს გადაწყვეტილებების შეზღუდვაა.