იუსტიციის მინისტრის, თეა წულუკიანმა არჩევნების მეორე ტურზე საუბრისას განაცხადა, გაერთიანებული ოპოზიციის საპრეზიდენტო კანდიდატი, გრიგოლ ვაშაძე არა საპრეზიდენტო სკამისთვის, არამედ საქართველოს ექსპრეზიდენტის, მიხეილ სააკაშვილის შეწყალების უფლებისთვის იბრძვის.

"მან ეს ღიად გვითხრა და მას არ აქვს სხვა მიზანი, თუ არა მოხვდეს ამ სკამზე, რომ შეიწყალოს სააკაშვილი და სხვა ის ადამიანები, ვინც დღეს ან ქართულ საპატიმროებში არიან, ან კიდევ არიან ქვეყნის გარეთ საექსტრადიციო პატიმრობაში ან რომელთა ექსტრადიციაც მოთხოვნილია", — განაცხადა წულუკიანმა ჟურნალისტებთან საუბრისას.

ყოფილი მაღალჩინოსნების შეწყალება

გაერთიანებული ოპოზიციის საპრეზიდენტო კანდიდატმა განაცხადა, რომ პრეზიდენტად არჩევის შემთხვევაში პოლიტიკურ პატიმრებს შეიწყალებს.

""მიხეილ სააკაშვილს და დანარჩენ პოლიტპატიმრებს, რომლებიც ციხეში არიან. ვანო მერაბიშვილსაც და ახალაიასაც, ცააძესაც და სულ ყველას. მორჩა უკვე, პოლიტიკური დევნა საქართველოში უნდა დამთავრდეს", — განაცხადა ვაშაძემ.

ვაშაძის განცხადებას შინაგან საქმეთა და სასჯელაღსრულების ყოფილი მინისტრი, ბაჩო ახალაია გამოეხმაურა, რომელიც ამბობს, რომ არ აპირებს გრიგოლ ვაშაძის გაპრეზიდენტების შემთხვევაში მას შეწყალების თხოვნით მიმართოს. მისი თქმით, უსამართლო სასჯელის მოხდის მიწურულს შეწყალება არ სჭირდება.

გრიგოლ ვაშაძისთვის შეწყალების თხოვნით მიმართვას არც საქართველოს ყოფილი პრეზიდენტი აპირებს. სააკაშვილი გეგმავს, რომ საკუთარი უფლებები სამართლებრივად დაიცვას.

საქართველოს ექსპრეზიდენტს, მიხეილ სააკაშვილს ვალერი გელაშვილის ცემის საქმეზე 6 წლიანი, სანდრო გირგვლიანის საქმეზე კი 3 წლიანი თავისუფლების აღკვეთა აქვს მისჯილი. შინაგან საქმეთა ყოფილი მინისტრის ვანო მერაბიშვილს, ვალერი გელაშვილის ცემის საქმეზე სასჯელის ზომად განესაზღვრა თავისუფლების აღკვეთა ექვსი წლისა და ცხრა თვის ვადით. ამავე დროს ჩამოერთვა, თანამდებობის დაკავების უფლება ორი წლითა და სამი თვით. თავდაცვის ყოფილი მინისტრ ბაჩო ახალაიას კი პოლკოვნიკ სერგო თეთრაძის წამების საქმეზე 9-წლიანი პატიმრობა აქვს მისჯილი.

საპრეზიდენტო არჩევნების მეორე ტური

2018 წლის საპრეზიდენტო არჩევნებზე ცესკომ ხმების 100% დაითვალა. მონაცემების მიხედვით, ხელისუფლების მხარდაჭერილ კანდიდატ სალომე ზურაბიშვილსა და გაერთიანებული ოპოზიციის კანდიდატ გრიგოლ ვაშაძეს შორის მეორე ტური გაიმართება.

შედეგები ასე გადანაწილდა:

  • სალომე ზურაბიშვილი (ხელისუფლების მხარდაჭერილი კანდიდატი) — 38,64%;
  • გრიგოლ ვაშაძე (ძალა ერთობაში) — 37,74%;
  • დავით ბაქრაძე (ევროპული საქართველო) — 10,97%;
  • შალვა ნათელაშვილი (ლეიბორისტული პარტია) — 3,74%;
  • ზურა ჯაფარიძე (გირჩი) — 2,26%;
  • დავით უსუფაშვილი (შენების მოძრაობა) — 2,26%.