საქართველოს ყოფილი პრეზიდენტი, მიხეილ სააკაშვილი აცხადებს, რომ ოპოზიციის კანდიდატის, გრიგოლ ვაშაძის გაპრეზიდენტების შემთხვევაში, ის არ აპირებს მას შეწყალებით მიმართოს. სააკაშვილი გეგავს, რომ საკუთარი უფლებები სამართლებრივად დაიცვას. ამის შესახებ მან რუსთავი 2-ის ეთერში, გადაცემა "არჩევანში" ისაუბრა.

"ვისი რა შესაწყალებელი მჭირს? თქვენ ალბათ ვიღაცაში გერევით. მე თითზე გადასახვევი არ წამომიღია საქართველოდან. რაც მქონდა და ვისაც დახმარება უნდოდა, ჩავდე საპრეზიდენტო ბიბლიოთეკაში, რომელიც ჩემი საკუთრება არაა... მე არცერთი სხვა დანაშაული არ მიმიძღვის საქართველოს წინაშე, გარდა იმისა, რომ ავაშენე ქართული სახელმწიფო. რაზე უნდა მივმართო? შემიწყალეთ, უკაცრავად ქართული სახელმწიფო ავაშენეო"? — ამბობს სააკაშვილი.

გაერთიანებული ოპოზიციის კანდიდატის, გრიგოლ ვაშაძის მეორე ტურში გადასვლის შემდეგ, მმართველი გუნდი იმაზე ალაპარაკდა, რომ ვაშაძე სააკაშვილს და მის სხვა თანაგუნდელებს შეიწყალებს.

ქართული ოცნების დეპუტატმა გედევან ფოფხაძემ განაცხადა, რომ თუ გრიგოლ ვაშაძე საპრეზიდენტო არჩევნებს მოიგებს, ეს იქნება რეალური ნაბიჯი სამოქალაქო ომის დასაწყებად. მისი თქმით, ამაში დარწმუნებული არის და საფუძველს აძლევს ნაციონალური მოძრაობის რევანშისტული განწყობა.

"ვღებულობთ ვაშაძის სახით ტროას ცხენს, რომელიც როცა ხვდება პრეზიდენტის სასახლეში, მისი მუცელი იღება და იქიდან გადმობრძანდებიან ჩემს მიერ დასახელებული ბატონები იმ ზონდერებთან ერთად, რომლებიც აქ მასკებით დარბოდნენ თბილისში", — განმარტავს ფოფხაძე.

ყოფილი ხელისუფლების დაბრუნების საფრთხეზე დღეს, 30 ოქტომბერს განცხადება ტელეკომპანია იმედმაც გაავრცელა. ტვ იმედის ცნობით, მათი ჟურნალისტები მუშაობის საგანგებო რეჟიმზე გადადიან და ღიად ემიჯნებიან ოპოზიციის კანდიდატ გრიგოლ ვაშაძეს.

"გრიგოლ ვაშაძე ამბობს, რომ შეიწყალებს მიხეილ სააკაშვილს, ძმებ ახალაიებს, ვანო მერაბიშვილს, მეგის ქარდავას და ყველას, ვისი სახელიც ნაციონალური მოძრაობის დანაშაულებრივ რეჟიმს უკავშირდება. ძალადობა, ბიზნესების წართმევა, ტელევიზიაში შეჭრა. სწორედ ამიტომ არის მიუღებელი იმედისთვის გრიგოლ ვაშაძის პრეზიდენტობა", — ნათქვამია განცხადებაში.

საპრეზიდენტო არჩევნების მეორე ტური ხელისუფლების მხარდაჭერილ კანდიდატ სალომე ზურაბიშვილსა და გაერთიანებული ოპოზიციის კანდიდატ გრიგოლ ვაშაძეს შორის გაიმართება.