ცესკოს ინფორმაციით, 2018 წლის საპრეზიდენტო არჩევნებზე ყველა საოლქო საარჩევნო კომისიაში 364 საჩივარია შესული. საჩივრები ადგილობრივმა დამკვირვებელმა ორგანიზაციებმა და საარჩევნო სუბიექტების წარმომადგენლებმა დაწერეს. ცესკოს ცნობით, საჩივრები ძირითადად პროცედურულ ხარვეზებს ეხება. მათივე ინფორმაციით, მოთხოვნა ორ საარჩევნო უბანზე კენჭისყრის შედეგების გაბათილებაა, უმეტეს შემთხვევაში კი კომისიის წევრებისთვის დისციპლინური პასუხისმგებლობის დაკისრება.

ცესკოს პრესსპიკერმა, ანა მიქელაძემ ბრიფინგზე შემდეგ დარღვევებზე ისაუბრა:

  • მარნეულის #52 საარჩევნო უბანზე წარმომადგენლის მხრიდან კომისიის მუშაობისთვის ხელის შეშლის მცდელობა დაფიქსირდა, რის შემდეგაც წარმომადგენელს უბანი დაატოვებინეს;
  • ქუთაისის #49, #110 და ბათუმის #6 საარჩევნო უბნებზე ანალოგიური შემთხვევა დაფიქსირდა და წარმომადგენელს შენიშვნა მისცეს;
  • ახალქალაქის #49 საარჩევნო უბანზე ამომრჩეველი პირადობის მოწმობის გარეშე ხმის მიცემას ცდილობდა, რისი შესაძლებლობაც არ მისცეს;
  • ნინოწმინდის #26 საარჩევნო უბანზე საარჩევნო სუბიექტის წარმომადგენელი მრავალეროვანი საქართველოს დამკვირვებელს არ უშვებდა საარჩევნო უბანზე, თითქოს დამკვირვებელს ყალბი მოწმობა ჰქონდა; დამკვირვებელმა ინფორმაციის გადამოწმების შემდეგ უბანზე შესვლა შეძლო;
  • მარნეულის #18 უბანზე ოთხმა ამომრჩეველმა კენჭისყრაში მონაწილეობა ვადაგასული პირადობის მოწმობებით მიიღო. ერთ შემთხვევაში ამომრჩეველმა ხმა პასპორტის საშუალებით მისცა. დანარჩენ სამ შემთხვევაში ამომრჩევლებს უვადო პირადობის მოწმობები მისცეს, რის შემდეგაც მათ არჩევნებში მონაწილეობა მიიღეს.

2013 წლის საპრეზიდენტო არჩევნებზე არჩევნების დანიშვნის დღიდან მის დასრულებამდე, 2013 წლის პირველი ივლისიდან 12 ნოემბრამდე, საარჩევნო ადმინისტრაციაში სულ 417 განცხადება/საჩივარი შემოვიდა.