მიუხედავად იმისა, რომ კანდიდატი არ ჰყავს მმართველი პარტია, ქართული ოცნება ამბობს, რომ ეგზიტპოლი ექნება. ამის შესახებ არჩევნების წინა დღეს, ირაკლი კობახიძემ განაცხადა.

კობახიძის თქმით, ეგზიტპოლს კვლევითი ორგანიზაცია ფსიქოპროექტი 100 უბანზე ჩაატარებს. მისივე თქმით, შედეგებს უბნების დახურვისთანავე, რვა საათზე გამოაცხადებენ.

მიუხედავად იმისა, რომ ნაციონალური მოძრაობა ეგზიტპოლს არ ატარებს პარლამენტის თავმჯდომარე მოუწოდებს მათ "არ გააყალბონ საკუთარი ეგზიტპოლის შედეგები". ეგზიტპოლს ატარებს სამაუწყებლო კომპანია რუსთავი 2. კობახიძემ ბრიფინგში ტელევიზიაზეც ისაუბრა.

"მოვუწოდებთ, რუსთავი 2-ს, გარდა ნაციონალური მოძრაობის დაკვეთით ჩატარებული ეგზიტპოლისა, დადოს სხვა პარტიების დაკვეთით ჩატარებული ეგზიტპოლების შედეგებიც", — განაცხადა კობახიძემ.

როგორც რუსთავი 2-ის საინფორმაციო სამსახურის უფროსმა, ნოდარ მელაძემ On.ge-ს უთხრა კვლევას გასული წლების მსგავსად კვლავ კომპანია ედისონ რისერჩი ჩაატარებს, პირველადი შედეგი კი 20 საათზე გახდება ცნობილი.

ეგზიტპოლს არ ჩაატარებს არც ტელეკომპანია იმედი და არც საზოგადოებრივი მაუწყებელი. ტელეკომპანია იმედის საინფორმაციო სამსახურის უფროსი, ნანა ლეჟავა ამბობს, რომ მათი არხი სხვა ეგზიტპოლებს დაეყრდნობა.