შინაგან საქმეთა სამინისტროს განცხადებით, პრეზიდენტობის კანდიდატი ზურა ჯაფარიძე პოლიციას თავისი ნებით გაყვა.

უწყების განმარტებით, დედა ენის ბაღში მარიხუანის ლეგალიზაციის ფესტივალთან დაკავშირებით რამდენიმე დღეა გამოძიებას ატარებს. როგორც სამინისტრო აცხადებს, გამოძიების ფარგლებში ჯაფარიძის მიმართ აუცილებელი გახდა საგამოძიებო მოქმედებების ჩატარება, რაც შეკრებილი ხალხის რაოდენობის გამო შეუძლებელი იყო.

"ვინაიდან ზურაბ ჯაფარიძე პრეზიდენტობის კანდიდატია, სამართალდამცველებმა მას შესთავაზეს საგამოძიებო მოქმედებებში მონაწილეობის მისაღებად, პოლიციის განყოფილებაში გაყოლა. ზურაბ ჯაფარიძე პოლიციის თანამშრომლებს გაჰყვა ნებაყოფლობით", — ნათქვამია შსს-ს განცხადებაში.

უწყების თქმით, ამ ეტაპზე მისი მონაწილეობით მიმდინარეობს საგამოძიებო მოქმედებები. გამოძიების ფარგლებში, შსს-მ მანამდე გირჩის სამი ლიდერი იაგო ხვიჩია, ვახტანგ მეგრელიშვილი, ნიკა ობოლაძე და ორი მხარდამჭერი გადაიყვანა განყოფილებაში.

ასევე, მარიხუანას ფესტივალის ორგანიზებისა და პოლიციის მიმართ წინააღმდეგობის გაწევისთვის ამ ეტაპზე ჯამში დაკავებულია 11 პირი.