საქართველოს ეროვნულ ბანკის აღმასრულებელ დირექტორად ქართული ოცნების შემომწირველი და საზოგადოება 2030-ის ანალიტიკოსი ვახტანგ ბურკიაშვილი დაინიშნა. საქართველოს ეროვნული ბანკის პრესსამსახურში On.ge-ს განუცხადეს, რომ ბურკიაშვილი თანამდებობაზე კონკურსის წესით შეირჩა. ის მოვალეობის შესრულებას ხვალიდან, 17 ოქტომბრიდან შეუდგება.

ვახტანგ ბურკიაშვილმა ქართულ ოცნებას 50 000 ლარი 2016 წელს შეწირა. On.ge-სთან საუბრისას ბურკიაშვილმა განმარტა, რომ როგორც მოქალაქეს აქვს პირადი შეხედულება და სიმპათია ქართული ოცნების მიმართ და მისი შემოწირულობაც ამ სიმპათიის გამოხატულებაა.

"მე ვარ არაპოლიტიკური, არაპარტიული და როგორც მოქალაქეს, მაქვს უფლება გამოვხატო ჩემი სიმპატიები, მხარს ვუჭერ ქართულ ოცნებას, როგორც მოქალაქე", — უთხრა On.ge-ს ვახტანგ ბურკიაშვილმა.

კითხვაზე, აპირებს თუ არა ფულადი მხარდაჭერა გამოუცხადოს, სალომე ზურაბიშვილს, როგორც ქართული ოცნების მიერ მხარდაჭერილ კანდიდატს, ვახტანგ ბურკიაშვილი ამბობს, რომ შემოწირულობა არ განუხორციელებია და სამომავლოდაც, არ გეგმავს.

ვახტანგ ბურკიაშვილის თქმით, 2030-ის ანალიტიკოსობის გარდა, მას საკმაოდ მრავალფეროვანი რეზიუმე აქვს და მისი გამოცდილება პირდაპირ უკავშირდება იმ საქმეს, რომელსაც ეროვნულ ბაკში შეასრულებს.

"მესმის, მცდელობა, ყველაფერი ბიძინა ივანიშვილთან დააკავშირონ. ჩაიხედონ სივი-ში და ნახავენ, რომ ეს არის ჩემი პროფილი. შესარჩევი კონკურსი იყო ღია, ყველაფერი ძალიან გამჭვირვალედ მოხდა", — უთხრა On.ge-ს ვახტანგ ბურკიაშვილმა.

ვახტანგ ბურკიაშვილი ბიზნესმენიცაა. საჯარო რეესტრის მონაცემებით, ის ფლობს შპს-ს ტიფლის დეველოპმენტ კონსორციუმს. ასევე არის მეწილე შპს-ების: საკი - პეტროლიუმი, მიო + და აი იუ ეს გრუპი.

კითხვაზე, ექნება თუ არა რაიმე ინტერესთა კონფლიქტი, როცა ბიზნესის დარეგულირება მოუწევს, ვახტანგ ბურკინაშვილი ირწმუნება, რომ მისი საქმიანობა ფინანსურ სექტორთან არ გადაიკვეთება.

"აღნიშნულ ფინანსურ სექტორში ჩემი ბიზნესი არ არსებობს და არც არასდროს ყოფილა", — ამბობს ვახტანგ ბურკინაშვილმა.

საქართველოს ეროვნული ბანკის ყოფილი აღმასრულებელი დირექტორი გიორგი მელაშვილი, რომელიც ამ პოსტს 2009 წლიდან იკავებდა, სამუშაოდ მიმდინარე წელს სს საქართველოს ბანკში გადავიდა.