მას შემდეგ, რაც პრემიერმინისტრმა, გიორგი კვირიკაშვილმა, ქართული ოცნების მაჟორიტარი დეპუტატობის კანდიდატების წარდგენისას განაცხადა, რომ პარტიას მთაწმინდის პირველ ოლქში საკუთარი კანდიდატი არ ეყოლება და ის მხარს დამოუკიდებელ კანდიდატს, სალომე ზურაბიშვილს დაუჭერს, ზურაბიშვილი ამ ფაქტს თავის Facebook გვერდზე გამოეხმაურა:

"რომ ვთქვა, არ ველოდებოდი ოცნების გადაწყვეტილებას, მაშინ თქვენთან მთლად გულწრფელი არ ვიქნები... მას შემდეგ, რაც ჩემი გეგმები გავუზიარე პრემიერს, ასეთი გადაწყვეტილების იმედიც და მოლოდინიც მქონდა, თუნდაც მარტივი ლოგიკიდან გამომდინარე და სწორი გათვლის შედეგად. თუმცა, იმის გარანტია არ არსებობდა, რომ ოცნება თავისი ალტერნატიულ კანდიდატურას არ დააყენებდა პირველივე ტურზე, როგორც ბუნებრივია პარტიულ ცხოვრებაში.

პრემიერის განცხადებით ძალიან გახარებული დავრჩი და არა მხოლოდ ჩემი პირადი მიზნებიდან გამომდინარე. ასეთი გადაწყვეტილება მართლაც უპრეცედენტო ნაბიჯად ჩაითვლება ქართულ პოლიტიკაში. პარტია დამოუკიდებელ და ზოგჯერ საკმაოდ კრიტიკულ და ყოველთვის თავისუფალ პიროვნებას უთმობდეს ბრძოლის ველს, ნამდვილად სიახლეა ქართულ ცნობიერებაში და აქამდე დამკვიდრებულ პოსტ საბჭოთა ცნობიერებაშიც.

მეორე უმნიშვნელოვანესი ფაქტორი მდგომარეობს იმაში, რომ ამ ნაბიჯის გამართლება მე კი არ ვარ და ჩემი წარსული თუ გამოცდილება, არამედ ქართული ემიგრაცია. ძალიან ვამაყობ იმით, რომ მის წარმომადგენლად ასეთი ფორმით მაღიარეს. პირველად, ამ ნაბიჯით ემიგრაციის ინტერესების, უფლებების და პოლიტიკური წონის აღიარება მოხდა, სხვა პარტიების სრული დუმილის ფონზე. ესეთი სრულიად ახალი მიდგომა ჩემთვის დამაიმედებელია და ამავდროულად ყველაზე საპასუხისმგებლო".