შსს-ს კახეთის პოლიციის დეპარტამენტის თანამშრომლებმა ქვევრში ნაპოვნი ქალის მკვლელობაში ბრალდებული დააკავეს. აღნიშნულის შესახებ უწყება განცხადებას ავრცელებს, სადაც წერია რომ 1988 წელს დაბადებული, წარსულში ნასამართლევი პირი განზრახ მკვლელობის ბრალდებით დააკავეს.

შსს-ს ცნობით, გამოძიებამ დაადგინა, რომ ბრალდებულმა მიმდინარე წლის 5 აგვისტოს, ღამით, ყვარლის რაიონის სოფელ შაქრიანში, თანასოფლელის, 1939 წელს დაბადებული თ. ხ.-ს საცხოვრებელ სახლში ქურდობის მიზნით, ფარულად შეაღწია. სახლის მეპატრონემ გ. ხ. შეამჩნია, რის შემდეგაც ბრალდებულმა ქალბატონს თავის არეში ბლაგვი საგნით დაზიანებები მიაყენა, მისი სხეული მარანში, ქვევრში, კვალის დაფარვის მიზნით გადამალა, ხოლო სახლში ხანძარი გააჩინა და მიიმალა.

პოლიციამ ბრალდებული მომხდარიდან რამდენიმე დღეში, თელავში დააკავა.

შსს-ს განცხადებით, დაკავებული ჩადენილ დანაშაულს აღიარებს. გამოძიება განზრახ მკვლელობის ფაქტზე მიმდინარეობს.

10 აგვისტოს, ყვარლის მუნიციპლიტეტის სოფელ შაქრიანში რამდენიმე დღის წინ გაუჩინარებული ქალი ქვევრში გარდაცვლილი იპოვეს.