პრეზიდენტობის კანდიდატი, გრიგოლ ვაშაძე მიიჩნევს, რომ აგვისტოს ომის დროს სამხედრო მოქმედებების დაწყება საქართველოსთვის დაბრალება, ქვეყნისთვის წაყენებული ბრალდებაა. ასე გამოეხმაურა ვაშაძე ქართული ოცნების მიერ მხარდაჭერილი კანდიდატის, სალომე ზურაბიშვილის შეფასება აგვისტოს ომის დაწყვებასთან დაკავშირებით.

"ადამიანი, რომელიც დიპლომატობას იბრალებს და სახელმწიფო სამსახურის გამოცდილებას, იმდენი მაინც უნდა ესმოდეს, რომ ბრალდებას ხელისუფლებას კი არ უყენებს, ბრალდებას უყენებს საქართველოს. იმ პირობებში, როცა საქართველოს ჰააგაში და სტრასბურგში საქართველოს რუსეთის წინააღმდეგ ორი საქმე აქვს შეტანილი", — განაცხადა ვაშაძემ.

ქართული ოცნების მიერ მხარდაჭერილმა საპრეზიდენტო კანდიდატმა, სალომე ზურაბიშვილმა 11 სექტემბერს გადაცემა რეაქციაში განაცხადა, რომ საქართველომ ცხინვალში თავისი მოსახლეობა დაბომბა და ეს ფაქტებითაა დასაბუთებული.

"ჩვენ დავბომბეთ ჩვენი მოსახლეობა, რისი უფლებაც არც ერთ პრეზიდენტს არ გააჩნია. ჩვენ მეორე დღეს როგორ უნდა ვთქვათ, რომ ამ ქვეყნის მთლიანობა გვინდა? მე მინდა მთლიანობა ამ ქვეყნის და არ მინდა, რომ პრეზიდენტმა დაბომბოს თავისი ტერიტორია და ქალაქები", — განაცხადა სალომე ზურაბიშვილმა.

კითხვა, თუ ვინ დაიწყო ომი, საქართველომ თუ რუსეთმა, სალომე ზურაბიშვილს მაშინ დაუსვეს, როცა მან საპრეზიდენტო არჩევნებში საკუთარი კანდიდატურა წარადგინა.

"ჯერ ერთი, უნდა ვიყოთ ტერმინებში სწორი. მე ყოველთვის ვამბობდი და ვამბობ, რომ ომი დაიწყო საუკუნის წინ რუსეთმა, ჩვენ იმ დროს ჩავერთეთ რუსეთის პროვოკაციაში და წავედით ამ საომარ ვითარებაში, საქართველომ დაიწყო ეს ნაწილი ამ საომარი ვითარების. ეს არის ყველასთვის ცნობილი და ოფიციალური ვერსია, რასაც ევროკავშირი ადასტურებდა, ჩვენ ამას არ გადავხედავთ", — თქვა ზურაბიშვილმა.