საპარლამენტო უმრავლესობის ლიდერის თქმით, ქართულ ოცნებას ჰქონდა რესურსი და შესაძლებლობა შეექმნა ახალი მედია, მაგრამ ეთიკის საკითხია, რომ მმართველ გუნდს არ ჰქონდეს საკუთარი მედია. ამის შესახებ მან საერთაშორისო კონფერენცია მსოფლიო თავდაყირა 2018-ზე განაცხადა.

"ასე რომ, ჩვენ ერთგული ვრჩებით მედიიის თავისუფლების. გვჭირდება კრიტიკული, თავისუფალი და დამოუკიდებელი მედია", — განაცხადა თალაკვაძემ.

ტელეკომპანია იბერიამ 7 სექტემბერს განცხადება გაავრცელა, სადაც ეწერა, რომ ხელისუფლებამ დაფინანსების მთავარი წყარო გადაუკეტა.

"კომპანია ომეგა ჯგუფი, რომლის შემადგენლობაში შედის ტელეკომპანია იბერია, პარალიზებულია. ჩვენ გაქვს ინფორმაცია, რომ ომეგა ჯგუფზე ხდება ზეწოლა, რათა ხელში ჩააგდონ იბერია. ჩვენ, ჟურნალისტები კატეგორიულად მოვითხოვთ დაუყოვნებლივ შეწყდეს დარტყმა დამოუკიდებელ მედიასა და მიეცეს მუშაობის საშუალება ომეგა ჯგუფს", — ეწერა იბერიას განცხადებაში.

ფინანსთა სამინისტროს განცხადებით, ომეგა ჯგუფში შემავალ სიგარეტის მწარმოებელ კომპანია შპს ოჯთ-ის საგადასახადო დავალიანების სახით ერიცხება 51 717 000 ლარი. სამინისტროს განმარტებით, დავალიანების ძირითად ნაწილს შეადგენს თამბაქოს ნაწარმზე აქციზის გადასახადის გადაუხდელობა. აღნიშნული დავალიანება დეკლარირებულია გადამხდელის მიერ 2015-2018 წლებში.

"იძულებითი ღონისძიებების გადავადების მიუხედავად, კომპანიამ საგადასახადო დავალიანების შემცირების ნაცვლად, განაგრძო დავალიანების ზრდა, რის გამოც შემოსავლების სამსახური იძულებული გახდა გამოეყენებინა მისთვის კანონით მინიჭებული ღონისძიებები", — ნათქვამია ფინანსთა სამინისტრის განცხადებაში.