ხორავას ქუჩის საქმეზე მოკლულის დავით სარალიძის მამის, ზაზა სარალიძის საპროტესტო აქციას ევროპული საქართველოს დეპუტატები შეუერთდნენ.

პარტიის ერთ-ერთი ლიდერისა და საგამოძიებო კომისიის თავმჯდომარის, სერგი კაპანაძის განცხადებით, უსამართლობა, რომელიც სარალიძეს შეემთხვა, გამოსაფხიზლებელია.

"დღეს უკვე ყველამ იცის, ვინ დააფარა მკვლელებს ხელი და ვინ გაამრუდა გამოძიება. ახლა მნიშვნელოვანია, ჩვენ ყველამ ერთად, სხვადასხვა ზეწოლის ფორმები გამოვნახოთ, რომ ეს რეკომენდაციები შევასრულებინოთ", - უთხრა On.ge-ს სერგი კაპანაძემ.

სერგი კაპანაძესთან ერთად აქციაზე იმყოფებიან ევროპული საქართველოს დეპუტატები: ელენე ხოშტარია, ოთარ კახიძე, გიგა ბოკერია და ირაკლი აბესაძე.

ზაზა სარალიძემ აქციები საქართველოს პარლამენტთან მას შემდეგ განაახლა, რაც ხორავას ქუჩის საქმეზე შექმნილმა საგამოძიებო კომისიას დასკვნებისა და რეკომენდაციების ნაწილი წარადგინა. მას შეუერთდა მალხაზ მაჩალიკაშვილიც. ორივე მათგანი სამართლიანობის აღდგენას ითხოვს.

ზაზა სარალიძემ On.ge-ს უთხრა, რომ პარლამენტის შენობასთან იმ დრომდე დარჩება იქამდე, სანამ სამართლიანობა არ აღდგება.

"ქართული საზოგადოება ხედავს, რომ შერჩევითი სამართლის მსხვერპლი ვარ", - განაცხადა სარალიძემ.

ხორავას ქუჩის საქმის საგამოძიებო კომისიის სხდომაზე პარტია ევროპული საქართველოს მიერ წარმოდგენილი დასკვნა დაამტკიცეს ცხრა ხმით ოთხის წინააღმდეგ. სხდომაზე კენჭი უყარეს ქართული ოცნების დასკვნასაც, რომელსაც მხოლოდ ოთხი მომხრე ჰყავდა.

ქართულმა ოცნებამ დასკვნის საკუთარი ვერსია წარადგინა იმ მიზეზით, რომ ისინი არ ეთანხმებიან ოპოზიციის მიერ შემუშავებულ დოკუმენტს და მას "პოლიტიკურად მიკერძოებულს" უწოდებენ. სხდომის თავმჯდომარის, სერგი კაპანაძის თქმით, მხარდაჭერილი დასკვნა პარლამენტის უახლოეს ბიუროს სხდომაზე გავა.

2018 წლის 31 მაისს ხორავას ქუჩაზე მომხდარი მკვლელობის საქმეზე მოსამართლემ განაჩენი გამოაცხადა, რასაც დაზარალებული ზაზა სარალიძის მხრიდან პროტესტი მოჰყვა. მან ქუჩის გამოსვლების ორგანიზება დაიწყო.

ამავე თემაზე: 78-გვერდიანი დოკუმენტი და 32 რეკომენდაცია — საგამოძიებო კომისიის დასკვნა სრულად