შინაგან საქმეთა სამინისტროს ინფორმაციით, დიდი ოდენობით ნარკოტიკული საშუალებების უკანონოდ შეძენა-შენახვისა და გასაღების ბრალდებით 3 პირი დააკავეს. მათ შორის არის საქართველოს ეკონომიკისა და მდგრადი განვითარების სამინისტროს თანამშრომელი.

შსს-ს ცნობით, გამოძიება მას შემდეგ დაიწყეს, რაც მიიღეს ინფორმაცია, რომ დაკავებულებიდან ერთ-ერთი სისტემატურად ასაღებდა ნარკოტიკული საშუალებებს. უწყების ინფორმაციით, სამართალდამცავებმა ის იმ დროს დააკავეს, როდესაც მან ცირკის მიმდებარე ტერიტორიაზე დიდი ოდენობით ნარკოტიკული საშუალება გაასაღა.

რაც შეეხება ეკონომიკის სამინისტროს მოქმედი თანამშრომლის ჩხრეკისას, სამართალდამცავებმა "ბუპრენორფინის" შემცველი ერთი აბი და აბის 4 ნატეხი ამოიღეს. მესამე დაკავებულის ჩხრეკისას კი, როგორც უწყებაში ამბობენ, "სუბოტექსის" 5 აბი და ნარკოტიკული საშუალება მეთადონის (მარილი) შემცველი 19 კაფსულა ამოიღეს.

შინაგან საქმეთა სამინისტროს ცნობით, თბილისის საქალაქო სასამართლომ სამივე დაკავებულს აღკვეთის ღონისძიების სახით პატიმრობა შეუფარდა.

შსს-ს ინფორმაციითვე, გამოძიება დაკავებული ორი პირის მიმართ, საქართველოს სისხლის სამართლის კოდექსის 260-ე მუხლის მე5 ნაწილის "ა" და მე-6 ნაწილის "ა" ქვეპუნქტებით მიმდინარეობს. ეს მუხლი განსაკუთრებით დიდი ოდენობით ნარკოტიკული საშუალებების უკანონო შეძენა-შენახვას გულისხმობს და ისჯება თავისუფლების აღკვეთით ვადით 8-დან 20 წლამდე ან უვადოდ.

რაც შეეხება ეკონომიკის სამინისტროს თანამშრომელს, შსს-მ 260-ე მუხლის მე-3 ნაწილის "ა" ქვეპუნქტით დაიწყო გამოძიება. ეს მუხლი ითვალისწინებს თავისუფლების აღკვეთას 5-დან 8 წლამდე ვადით.