ახმეტის მუნიციპალიტეტის მერიამ თუშეთში მოსახლეობისთვის 3 900 ლარის ღირებულების საჩუქრების ტრანსპორტირებაში 46 800 ლარი დახარჯა. ამის შესახებ სახელმწიფო აუდიტის დასკვნაშია საუბარი, რომელიც 2018 წლის 17 ივნისით თარიღდება.

აუდიტის დასკვნის მიხედვით, 2016-2017 წლებში ახმეტის მუნიციპალიტეტის მერიამ ჯამში 5 ფრენისთვის 95 500 ლარი დახარჯა, საიდანაც მხოლოდ სამ შემთხვევაში გადაიყვანეს ადგილობრივი მოსახლეობა და მათთვის სასურსათო მარაგი და საჭირო ინვენტარი გადაიტანეს.

"რაც შეეხება დანარჩენ ორ ფრენას, მუნიციპალიტეტის მიერ მოწოდებული ინფორმაციით ისინი განხორციელდა თუშეთში მცხოვრები პირებისათვის საახალწლო სასაჩუქრე პაკეტების გადასაცემად", - ვკითხულობთ ანგარიშში.

კერძოდ:

  • 2016 წლის 29 თებერვალს ვერტმფრენით იმგზავრა მუნიციპალიტეტის შვიდმა წარმომადგენელმა და შვიდმა ადგილობრივმა მოსახლემ. ამ დროს ადგილობრივ მოსახლეობას გადაეცა 1 300 ლარის ღირებულების საჩუქარები, მგზავრობის ღურებულება კი 21 300 ლარი იყო;
  • 2017 წლის 21 თებერვალს ავიარეისით იმგზავრა მუნიციპალიტეტის წარმომადგენლებმა და მათ მიერ მოწვეულმა სტუმრებმა, სულ 19-მა ადამიანმა. მოსახლეობას გადაეცა 2 600 ლარის ღირებულების საჩუქრები, მგზავრობა კი 25 500 ლარი დაჯდა.

"აღნიშნული ორი ფრენის ფარგლებში მოხდა 3,9 ათასი ლარის ღირებულების სასაჩუქრე პაკეტების ადგილობრივი მოსახლეობისათვის გადაცემა, რომლისთვისაც მუნიციპალიტეტმა გასწია 46,8 ათასი ლარის ხარჯი", - განმარტებულია აუდიტის დასკვნაში.