პრეზიდენტობის კანდიდატი, დავით უსუფაშვილი ამომრჩეველს ჰპირდება, რომ არჩევის შემთხვევაში ეცდება პარლამენტი თბილისში დააბრუნოს და პრეზიდენტის რეზიდენცია ათონელის ქუჩაზე გადაიტანოს:

"პრეზიდენტად არჩევის შემთხვევაში, შევალ ავლაბრის რეზიდენციაში და დაუყოვნებლივ დავიწყებ მცდელობას, რომ პარლამენტი დაბრუნდეს თბილისში და ამით პარლამენტის საქმიანობა მნიშვნელოვნად გაუმჯობესდეს. ავლაბრის რეზიდენციაში უნდა განთავსდეს საქართველოს რესპუბლიკის სასახლე, პრეზიდენტმა კი გააგრძელოს მუშაობა ათონელის ქუჩაზე არსებულ შენობაში".

მმართველი პარტიის ქართული ოცნების საარჩევნო 2013 წლის დაპირების მიხედვით, ათონელის ქუჩაზე მდებარე ორბელიანების სასახლეში უნდა გადასულიყო საქართველოს პრეზიდენტის ადმინისტრაცია. არჩევნების დასრულების შემდეგ გიორგი მარგველაშვილმა განაცხადა, რომ არ აპირებს ადმინისტრაციის ავლაბრიდან გადატანას.

ავლაბრის სასახლის დატოვების სურვილი გამოთქვა პრეზიდენტობის კიდევ ერთმა კანდიდატმა, სალომე ზურაბიშვილმა. მისი თქმით, მომავალი პრეზიდენტი ავლაბრის რეზიდენციაში აღარ უნდა იყოს. ზურაბიშვილის განმარტებით, სასახლეში შეიძლება, პრემიერ-მინისტრი, საგარეო საქმეთა მინისტრი შევიდეს ან უცხოელების მიღების ადგილი გახდეს.